#LuengasAragón  Culturas

Demandan a lo Gubierno d’Aragón “una lei de luengas y una autoridat lingüistica ta guarenciar a pervivencia de l’aragonés”

A Sociedat de Lingüistica Aragonesa y o Estudio de Filología Aragonesa han prencipiau un proceso de treballo de conchunta, “de dialogo y debat arredol de l’aragonés”
| 5 julio, 2015 12.07

Os procesos de compleganza tamién han plegau a o mundo de l’aragonés. O pasau sábado, a Sociedat de Lingüistica Aragonesa y o Estudio de Filología Aragonesa facioron una historica reunión en Graus ta prencipiar un proceso ubierto y plural “de compleganza arredol de l’aragonés”.

Istas asociacions -que s’han ganau con o suyo treballo a reconoixencia d’a sociedat aragonesoparlant- demandan a lo Gubierno d’Aragón “una lei de luengas y a creyación d’una autoridat lingüistica pa l’aragonés”. Todas dos organizacions comparten un mesmo analisi d’a situación d’a luenga aragonesa y “a voluntat de treballar de conchunta”.

“A l’aragonés le cal de traza urchent una politica de planificación lingüistica endrezada de traza prioritaria enta zonas d’emplego a on que encara pervive”, sinyalan, y adhiben que “cal superar modelos artificiosos de luengas y grafias que s’aluenyan de l’espacio romanico que a nuestra luenga en fa parte”.

Asinas, tamién entienden que “a existencia d’una visión plural d’a luenga y d’os procesos de codificación no ha de meter entrepuces a la pervivencia de l’aragonés ni fer-se enchaquia de contino ta concarar-se”.

A la nueva DCHA le demandan que “prenga as midas que calga y pare cuenta d’a urchencia historica, pa poder guarenciar que no se trenque a transmisión cheneracional d’a luenga” y concretan as demandas en a “celebración d’actos culturals, a redacción d’una lei de luengas y a institucionalización d’una autoridat lingüistica pa l’aragonés”, demandas historicas d’o movimiento en defensa d’a luenga.

5 julio, 2015

Autor/Autora


Twitter
Facebook

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pinche el enlace para mayor información.

CERRAR