Dende Purna, organización chovenil, independentista, revolucionaria y feminista, con motivo d'o diya internacional contra a violencia sexista, nos veyemos en a necesidat de reiterar o nuestro absoluto refuse a toda mena de violencia masclista.
Entendemos o feminismo como un feminismo de clase en que a participación activa d'a muller siga un punto clau ta levar a cabo con exito a revolución socialista y sin a que ye imposible aconseguir a completa emancipación d'a muller. A violencia a la que somos sozmetidas mullers, gais, lesbianas, intersexo, transexuals, bisexuals u qualsiquier atra traza d'alteridat sexual no suposa un feito aislau, soque ye muestra d'un problema estructural que fa que repercuta en totz y cadagun d'os aspectos d'a nuestra vida. Establir una calendata como referencia d'un problema estructural tien sentiu si va acompanyau d'una actitut personal, d'una actividat cutiana que tratacte iste mesmo problema. D'ista traza os diyas como hue, contra a violencia masclista, sirven como altavoz d'una luita diyaria en a qual estamos nusatras as que tenemos que erichir-nos protagonistas y estar as que provoquemos ixe cambeo.
Denunciamos que existen atras menas de violencia masclista que son normalizadas; violencia eixercida en as carreras, en as tabiernas, en l'entorno laboral, en as casas nuestras, violencia eixercida contra os nuestros cuerpos en forma de violacions y abusos sexuals, violencia a traviés de trucos que en muitos casos rematan en feminicidio y muerte. Tampoco no hemos d'ixuplidar a violencia «sutil», aquella violencia psicolochica que afecta a nuestra autoestima y integridat, violencia en a publicidat y en os meyos de comunicación, que enriste contra a diversidat d'os nuestros cuerpos imposando un modelo de polideza irreyal y opresora; violencia permitida y eixercida por as mesmas institucions. Ista mena de violencias normalizadas por a sociedat son invisibilizadas y de cutio lo que provoca o refuerce d'os rols patriarcals.
L'alazet de tot proceso que quiera trencar con actitutz tan enradigadas como o sexismo ha d'estar a educación y en iste sentiu as primeras que hemos de concienciar-nos y educar-nos somos nusatras. Hemos de parar cuenta que o respeto que reclamamos parti en primer puesto por o respeto propio que hemos de tener por nusatras mesmas. Ye a partir de l'adopción d'ista actitut, dende a on podemos prencipiar a establir o marco a on cambiar o nuestro destino. Y dar eixemplo t'as cheneracions esdevenideras ta que no se perpetúe o modelo patriarcal de sociedat en a que vivimos. A violencia de chenero ye un problema grave d'Estau, que ha de creyar condicions ta prevenir, atender, sancionar y erradicar a violencia masclista en quasiquiera d'as suyas manifestacions y ambitos, empentando cambios en os patrons socio-culturals que emparan a desigualdat de chenero y as relacions de poder sobre as mullers y a resta de suchetos discriminaus socialment por a suya orientación sexual u condición de chenero.
Hemos de parar cuenta que quan permitimos una agresión sobre nusatras no nomas somos sofriendo-la en primera persona soque repercute en a perpetuación de dito comportamiento a ran global. Perén hemos de responder con una actitut cerenya qualsiquier comportamiento que no consideremos acceptable. De vegadas puede estar de chent amanada y ye por ello que hemos de comprender que o patriarcau no nomas nos afecta a nusatras encara que como prencipals victimas somos as que hemos d'aturar qualsiquier mena de comportamiento entivocau y nomas istas serán as condicions que permitirán o cambio a una realidat an istas actitutz no se veigan emparadas, encluso en una primera linia, por nusatras mesmas.Por o dreito a una vida libre de violencias, a la soberanía y capacidat de decisión sobre os nuestros cuerpos y as nuestras vidas independientement de cómo vivamos a nuestra sexualidat y identidat de chenero. Empentando una sociedat basada en o buen trato como modelo de desembolique social alternativo a la violencia estructural d'o sistema capitalista-patriarcal.
¡Rematemos d'una vegada con a violencia masclista! ¡Luitemos por a transformación social feminista y socialista!
Purna, a chovenalla revolucionaria y independentista
