Arredol de meyo centenar de personas participoron entre lo maitín d'o pasau sabado en a trobada celebrada en Pirenarium, con l'obchectivo de fomentar la creyación artistica y l'intercambio entre disciplinas —ilustración, mosica, danza u escritura— como emparo a lo Movimiento per la Dignidat d'a Montanya.
La chornada prencipió con una mesa redonda d'experiencias en a cuala participoron Mullers Artistas Rurals (Aragón), Aplec dels Ports (País Valencià) y Pirineu Viu (Catalunya), compartindo practicas culturals vinculadas a la defensa d'o territorio, lo arraigo y las resistencias frent a los macroproyectos.
Entre tot lo día se podioron visitar una quincena de dibuixos y ilustracions, cedidas de traza altruista per ilustradors y ilustradoras vinculadas a la iniciativa Arte per una Montanya Digna, chunto a textos que replegan las reivindicacions d'o movimiento. Un material que reforza la ideya d'a cultura como luengache común y altavoz politico.
Dimpués d'a mesa redonda se celebró una asembleya ubierta, en a cuala s'alcordoron las prioridaz de treballo de l'ambito cultural en emparo a Pirineu Digno. Entre las linias definidas se presentó lo prochecto pa la creyación d'una canción colectiva, que mescle distintos estilos —folk, rap, rock— y aborde las problematicas d'o territorio, asinas como lo treballo pa editar una maqueta musical con a participación de diversos grupos.
Tamién se dio a conoixer lo prototipo d'un mapa web interactivo d'os conflictos socials y ambientals en o Pirineu aragonés, la revista Alparcera, publicación trilingüe que connecta l'Aragón que ye, lo que estió y lo que será, y la creyación d'una iniciativa d'Acción Poetica Pirineus pa empentar intervencions artistico-politicas en o espacio publico.
Entre las propuestas organizativas alcordadas destacan la enchegada de capazos comarcals de Pirineu Digno en Viello Aragón, Sobrarbe y Ribagorza —trobadas mensuals que combinan debat sociopolítico y actividat cultural— y la organización d'un festival popular arredol d'o 25 d'octubre, en commemoración del paro cheneral d'os Pirineus.
De nueits, la chornada se tresladó a la Sala Corleone, an se celebroron los conciertos. Ubrió la nueit Ester Vallejo, con colaboracions d'Alicia Cangüero y Ixeya, continó Ixeya y dimpués, lo colectivo de raperos La Cara B de Uesca fació bailar a tota la sala. Lo zarre corrió a cargo de L’Asia y la DJ oscense Rural Pogo. Amás, se celebrará un concierto de punk solidario pa recaudar fondos pa lo movimiento.
Dende la organización valoran positivament lo treballo colectivo realizau y han reiterau la importancia d'a cultura como ferramienta de difusión d'ideyas y de construcción comunitaria, subrayando lo esfuerzo desinteresau d'as centenars de personas que, dende distintos ambitos, son aportando chicoz y grans esfuerzos en a construcción d'un Pirineu Digno y un Aragón digno.
