O llargometracho “Con la tierra en los pies”, dirichiu por Fernando Vera —autor de “Los acordes de la memoria”—, tendrá a suya estrena mundial o sabado 14 de marzo en a 23ª edición d’Espiello – Festival Internacional de Documental Etnográfico de Sobrarbe. A proyección tendrá puesto a las 18.00 horas en o Palacio de Congresos de Boltaña, con presencia de l’equipo d’o film, dentra d’a sección “Se rueda en Sobrarbe”, dedicada a produccions rodadas en ista comarca d’o Pirineu aragonés.
O certamen se celebrará d’o 13 t’o 22 de marzo en Boltaña con o lema “Compromiso con los invisibles” y tornará a situar o documental etnográfico en o centro d’a programación cultural d’o Alto Aragón.
Dos camins que se cruzan en o Pirineu
A cinta combina elementos documentals y ficción inspirada en feitos reals ta relatar o encuentro entre dos historias: a d’o lingüista alemán Rudolf Wilmes y a d’o val de Vió, un territorio que en os anyos trenta se trobaba a las puertas de grans cambeos socials y economicos.
Wilmes plegó t’o Pirineu aragonés en 1930, ninviau por Fritz Krüger, director d’o Seminario de Lenguas y Culturas Románicas d’a Universidat d’Hamburgo, con l’obchectivo de replegar material lingüistico ta la suya tesis sobre l’aragonés. Mientres a suya estada en a zona, l’investigador s’interesó por a luenga, a cultura y as formas de vida tradicionals d’os lugars de Sobrarbe.
O documental utiliza iste episodio ta reflexionar sobre a identidat d’os lugars, a memoria colectiva y a defensa d’o patrimonio cultural y lingüistico en territorios marcaus por a despoblación.
Una figura vinculada con o nazismo
Dimpués d’a suya etapa d’investigación en o Pirineu, a trachectoria de Wilmes quedó marcada por o contexto politico d’Alemania d’entre guerras. O lingüista s’afilió en 1933 t’o Partido Nacionalsocialista (NSDAP), como tantos atros academicos d’a epoca, o mesmo anyo en que o nazismo plegó t’o poder.
Mientres o Tercer Reich treballó en oficinas d’o Ministerio d’Aviación d’o Reich (Reichsluftfahrtministerium) en Múnich. Bellas fuents apunten que dimpués amostró incomodidat con o que pasó mientres o rechimen, encara que no i hai evidencias de que tenese un papel dirichent u ideologico dentra d’o nazismo.
Mientres a suya estada en o Pirineu aragonés, a suya presencia plegó a despertar sospeitas d’espionache u propaganda, en un contexto europeo cada vez mas tensionau politicament. Con tot y con ixo, o suyo legau academico quedó ligaú sobre tot a os estudios lingüisticos y etnograficos sobre l’aragonés y a cultura pirenaica.
Voces sobre o Pirineu y a despoblación
“Con la tierra en los pies” reune amás a participación de diversas personas investigadoras y divulgadoras vinculadas con o Pirineu y o mundo rural, como Manuel Campo Vidal, Severino Pallaruelo, Sandra Araguás, José María Satué, Óscar Latas, Elena Puértolas u Maribel Clemente, entre atras.
A película cuenta con un elenco encabezau por Christian Stamm en o papel de Rudolf Wilmes (“El hombre de las mil caras”, “Nasdrovia”) y Isabelle Stoffel como Eike Wilmes (“La virgen de agosto”, “Karen”). As actrices Carla Chiorazzo (“El hotel de los líos. García y García 2”), Ibone Becana (“Novatos”), Leticia Pascual (“60m2”) y Itziar Aizpuru (Premio Feroz por “Loreak”) dan vida a Carmen en diferents momentos d’a suya vida. Javier Aranda, con larga trachectoria teatral, y Natividad Orozco (“Tono menor”) interpretan a o pai y a mai de Carmen.
Koldo A. Gabarain (“Errementari”, “Karpeta urdinak”, “Vivir girando”) ye o director de fotografía. Juanjo Javierre (“Fuera de carta”, “Que se mueran los feos”, “La caza”, “Behind India”) firma a composición d’a música, y Josune Lasa (“La fuga de Segovia”, “Todo es mentira”, “Secretos del corazón”) ye a directora d’arte. Unai Gimenez fa de chife de soniu y Gorka Askasibar asume a dirección de producción (“Las buenas compañías”, “Rifkin's Festival”). Por a suya parte, Rose Fernández (“Madre”, “Mientras dure la guerra”, “House of the Dragon”) ye a chifa de vestuario y Irenne Joven (“Planeta 5000”) a chifa de maquillache.
O prochecto cuenta con o apoyo d’o Gobierno d’Aragón, as diputacions provincials de Zaragoza y Uesca, o Justicia d’Aragón, o Parque Nacional d’Ordesa y Monte Perdiu, a Reserva d’a Biosfera Ordesa-Viñamala, o Instituto de Estudios Altoaragoneses y a Comarca de Sobrarbe, amás d’os ayuntamientos de Fanlo, Broto y Aínsa y entidades como Aragón TV, a Fundación Caja Rural d’Aragón u CERTEST.
