Comunicado.- Dende Ernai y Purna, organizacions chovenils independentistas y revolucionarias d'Euskal Herria y Aragón, nos adhibimos t'a manifestación convocada por a plataforma YESA + NO Lanak gelditu o vinient 15 de chunio en Zangoza contra o recreiximiento d'o entibo de Yesa. Se tracta d'una obra innecesaria que enriste dreitament contra o nuestro territorio, que mete en risque a vida d'as personas y que tien alternativas más sostenibles economica, social y meyoambientalment.
En os nuestros pueblos fa anyadas que padecemos as conseqüencias de entibos grans. En Nafarroa ye recient a lamentable experiencia d'o entibo d'Itoiz, do l'augua d'o pantano yera en desuso, y a Canal de Navarra, ha diya de hue sin rematar por falta de financiación. Y en Aragón, podemos fablar d'as experiencias desastrosas d'os pantanos de Chanovas, A Penya, Bubal, Lanuza u Mediano, entre atros, que han sometiu a vida d'as montanyesas a os intreses d'unas pocas, prevocando a expropiación de decenas de lugars en aras d'un falso intrés cheneral.
O recreiximiento de Yesa ha triplicau ya o suyo presupuesto inicial, tiene graus problemas de seguridat y un gran impacto social, cultural y meyoambiental. Dende Purna y Ernai refirmamos a os lugars que esfienden a suya tierra, conscients de que a esfensa d'o territorio ye imprescindible t'a construcción d'una realidat social más chusta, igualitaria y sostenible. A tierra perteneixe a os lugars que la treballan y que viven d'ella y no debe estar sometida a intreses especulativos d'interpresas privadas como ye o caso d'o Recreiximiento de Yesa.
Por ello, exichimos:
- L'ature inmediato d'o recreiximiento d'o entibo de Yesa
- O vaciau inmediato de l'actual entibo dica una cota segura t'os lugars que se troban auguas abaixo d'o entibo
- Garantizar a seguridat d'a presa actual
Nusatras, como organizacions revolucionarias y ecolochistas, compromesas en a esfensa d'a tierra y d'o territorio, apostamos por un modelo de desembolique integrau con o meyo y basau en o cudiau y o rispeto t'a tierra. Por ello, amostramos o nuestro más firme refuse a istas politicas hidraulicas, reiteramos o nuestro refirme t'as afectadas por istas obras y nos solidarizamos con istas luitas, fendo-las de nusatras.
Animamos t'a chovenalla vasca y aragonesa a que acuda a Zangoza o diya 15 de Chunio t'amostrar o refuse a o recreiximiento de Yesa. Esfendemos a tierra!
Ernai, gazte antolakundea y Purna, a chovenalla independentista y revolucionaria
