Huei, 20 d’Aviento, diya d’os Dreitos y Libertatz Nacioanls d’o nuestro pueblo, Puyalón de cuchas, organización politica d’a cucha independentista, contina o camín prencipiau enta la conquiesta d’as aspirazións d’o nuestro pueblo, igual que fació Juan de Lanuza, en o suyo tiempo.
Dende ista anviesta, a nuestra propuesta s’alazeta en un compromís politico an que sigan as esferents necesidatz d’as clases populars y d’o territorio.
Ye por isto que advogamos por l’acumulación de fuerzas arredol d’a luita por a liberación nacional y o socialismo, por una sociedat en que a producción y o consumo sigan organizaus por y ta la clase triballadera aragonesa. Por una democracia real y participativa, esferent a la democracia burguesa y delegativa.
Achugamos, tamién, por una sociedat esmilitarizada, en a que a solución d’os conflictos se faiga a traviés d’o dialogo y l’alcuerdo. Igual que luitamos por una sociedat en a qual no se discrimine a las presonas migrants y se las faiga veyibles a livel social, laboral y cultural. Asinas mesmo, entendemos que o chenero por o suyo carácter transversal, habría d’estar considerau en tot prochecto adedicau a lo desembolique d’o nuestro país, ya que a nuestra propuesta politica feminista, planteya a las mullers y a las presonas amarguinadas por a suya condición de chenero u orientación sexual, como sochetos d’aición y transformación socioeconomica en Aragón.
Tamién pensamos que o meyo en qual vivimos, o rural y l’urban, ha de vivir abrigau con parametros ecolochicos y sostenibles, y por ixo somos en contra d’os entibos de Mularroya, Yesa y Biscarrués, asinas como a mena de Borobia, o prochecto d’Aramón, u cualsiquier atro macro-prochecto que amenaixe o nuestro paisache natural.
D’a mesma forma, mos situgamos por fer veyibles as luengas propias, a traviés d’aicions que esfiendan as singularidatz d’o pueblo aragonés en iste aspecto. Ye alazetal ta la reconstrucción nacional reviscolar as luengas propias (aragonés y catalán), asinas mesmo como a cultura popular como parti vital d’a nuestra identidat colectiva como pueblo.
En zagueras, y no por ixo menos important, tenemos una achuga clau en o internacionalismo de clase, refirmando as luitas populars y socials de totz os pueblos, os procesos de escolonización y a creyación d’espacios cheograficos, economicos y socials por tot o planetar que creben a hechemonia capitalista-imperialista.
A la fin, nomás que mos queda agradeixer iste anyo que remata, o refirme d’o meyo rural aragonés, que s’ha feito real en a ripresentación d’un conceller en o Concello d’Artieda, siendo o primer d’a historia que esfiende un Aragón socialista, libre y independient, que pueda decidir sobre as suyas custions y que no siga siempre en mans d’as mesmas presonas como ya fa más de quatre sieglos.
ENTALTO ARAGÓN INDEPENDIENT Y REVOLUCIONARIO!!
Aragon a 20 d’Aviento de 2011
Puyalón de Cuchas (Organización politica d’a Cucha Independentista de Aragón).
