Lo estudeyo d'o félido dients de sable - Megantereon, un depredador d'a talla d'un chaguar actual que vivió entre lo Plioceno y Pleistoceno d'Eurasia, Africa y Norteamérica, ha confirmau que, a lo contrario que en atros félidos dients de sable como Machairodus y Homotherium, poseyeba uns caninos superiors que quedaban exposaus cuan zarraba la boca.
Esta conclusión ha estau posible gracias a lo estudeyo detallau de cómo sería la musculatura facial y partes tovas asociadas, asinas como de l'anatomía cranial y mandibular d'estes félidos. Los resultaus d'esta investigación, liderada per lo Museo de Ciencias Naturals (MNCN-CSIC) y en a cuala ha participau la Fundación Conchunto Paleontológico de Teruel - Dinópolis, revelan cómo los caninos superiors quedaban difuera d'a boca en bellas especies de félidos dients de sable.
Megantereon poseyeba uns caninos superiors muito largos y comprimius lateralment, y una variella con una fuerte prochección ventral d'a suya parte anterior, cuasi d'a mesma longaria que los caninos. Seguntes relata lo paleoartista Mauricio Antón, primer firmante d'o treballo y colaborador d'o MNCN: “Levaba anyos con a ideya d'embarcar-me en este estudeyo, que ha estau posible gracias a una detallada analisi de l'anatomía cranial y facial de carnívoros actuals, a partir d'analisis de CT-Scan, diseccions de especímenes actuals y gravacions d'animals salvaches en libertat”. Pa Juan Francisco Pastor, responsable d'as diseccions que s'han realizau en a Universidat de Valladolid: “Esta labor nos ha permitiu estudiar la disposición d'a musculatura facial y estructuras asociadas de cuantas especies de carnívoros”.
Los datos obtenius d'especies contemporanias estioron comparaus con os proporcionaus per cuantos cráneos de Megantereon de yacimients chineses y franceses. “Esta comparativa nos ha permitiu estudiar las proporcions cranials y inferir la estructura y disposición d'os musclos facials y labios en Megantereon”, explica Gema Siliceo, investigadora ARAID en a Fundación Conchunto Paleontológico de Teruel–Dinópolis.
Seguntes resume l'investigador d'o MNCN Manuel Salesa “cuan comparamos lo cráneo de Megantereon con o d'atros félidos dients de sable como Homotherium, observamos que lo primero poseyeba un paladar mas amplo, pero un premaxilar mas estreito, per lo que, en zarrar la boca, en Megantereon se cheneraba un espacio entre lo canino superior y la variella suficient pa alochar los labios. D'esta forma, los caninos superiors quedaban exposaus en zarrar la boca, pero protechius per lo desembolique ventral d'a sínfisis mandibular”.
Los autors consideran que lo desembolique d'esta prochección d'a variella, una morfolochía tipica de Megantereon, ye una transición entre los félidos dients de sable con caninos superiors amagaus per los labios y Smilodon, un d'os zaguers miembros d'o grupo, y que poseyió uns caninos superiors muito largos, y una variella sin prochección ventral d'a sínfisis.
Lo present treballo s'enmarca dentro d'o prochecto d'investigación COEVOFEL – Félidos de dients conicos vs. félidos dients de sable: orichen, coevolución y paleobiolochía, concediu per lo Ministerio de Ciencia, Innovación y Universidaz, y endrezau per Manuel Salesa (MNCN-CSIC). En esta investigación han treballau l'equipo de paleontólogos d'o departamento de Paleobiolochía d'o MNCN-CSIC, la Fundación ARAID (Achencia Aragonesa pa la Investigación y lo Desarrollo), la Fundación Conchunto Paleontológico de Teruel–Dinópolis (FCPT-DINIPOLIS), l'Academia China de Ciencias, y la Facultat de Medicina d'a Universidat de Valladolid (UVa),
