Dende SOA Ensinyanza informan que tienen “novedatz importants sobre a luita que levamos meses liderando per la dignidat d’a nuestra luenga y d’os suyos docentes”. A Chusticia d’Aragón, Concepción Gimeno, “nos ha dau la razón. Dimpués d’a queixa que presentamos o pasau mes de chunyo, la institución ha emitiu una resolución clara dirichida a lo Departamento d’Educación” d’o Gubierno d’Aragón.
Lo SOA sinyala que “no ibamos a permitir que os docentes de Luenga Aragonesa continasen estando tractaus como profesionales de segunda. Per ixo, acudimos a la Chusticia d’Aragón y agora celebramos con cautela iste paso enta debant”.
O sindicato destaca beluns d’os puntos clau “d’o comunicau que nos han ninviau”, como que a Chusticia d’Aragón “ha suxeriu formalment” a lo Departamento d’Educación d’a DChA que “faiga una nueva baremación, que se proceda a la rebaremación de méritos d’os integrantes d’a lista d’interinos de Luenga Aragonesa en Secundaria”, tamién que “respete la igualdat de condicions, ye decir, que cumpla con a normativa que exige actualizar istas listas cada tres anyos, igual que ocurre en o resto d’especialidatz”.
Amás, o SOA destaca que a Chusticia ha suxeriu a lo Gubierno d’Aragón “que ubra ambas listas, que s’abrigan u s’amplíen as listas de maestros y profesores de secundaria ta cubrir totas as plazas y baixas necesarias”, asinas como una “garantía de dreito, ye decir, recuerda a lo Gubierno d’Aragón la suya obligacion legal de garantir l’ensinyanza d’as nuestras luengas propias con una ufierta adecuada”.
“Tirón d’orellas a l’administración”
O SOA tamién asegura que “la Chusticia Gimeno lamenta que lo Departamento d’Educación no haya ninviau la información solicitada mientres a supervisión d’a queixa y les recuerda la suya obligacion legal d’auxiliar a ista Institución”.
¿Y agora qué?
“La Administración tiene un plazo d’un mes ta comunicar si acepta ista suxerencia”, per lo que dende SOA Ensinyanza aseguran que “seremos vigilants y informaremos a la población de si la consellera acepta u no y de si executa istos cambios que le suxiere la institución d’a Chusticia d’Aragón”, y concluyen exclamando “Per la ensinyanza de l’aragonés y per los dreitos d’os suyos treballadors!”.
