Chunta Aragonesista organiza este sabado en Zaragoza la chornada 'Voces que construyen, territorios que deciden', que definen como “un espacio concebiu no nomás pa ascuitar, sino per interactuar, debatir y construyir chuntos y chuntas”, seguntes ha explicau Joaquín Palacín, president nacional de CHA.
“Esta trobada no será nomás una chornada de debat, sino un punto de trobada an charraremos de politica, construyiremos alianzas, compartiremos visions y contrimostraremos que Aragón ye un territorio clau en o panorama estatal”, ha anyadiu.
Palacín ha detallau que “dende CHA hemos disenyau mesas de debat dinamicas en as cualas tamién i habrá espacio pa la participación activa, perque creyemos que las millors ideyas surten cuan compartimos, cara a cara, en un ambient ubierto y enriquecedor”.
En primerias, Jorge Pueyo, deputau de CHA en o Congreso, y Joan Baldoví, portavoz de Compromís en as Corz Valencianas, participan en o dialogo ‘Territorios que deciden’, un espacio pa reflexionar y compartir perspectivas sobre la importancia de tresladar los retos territorials a lo Estau, moderau per Isabel Lasobras, secretaria cheneral de CHA. Toz dos dialogarán sobre cómo los partius territorials son actors clau en a construcción de politicas que realment respondan a las necesidaz d'os países.
Contino, tendrá puesto la mesa interactiva ‘Voces que construyen’ con a participación de Silvia Mellado (Verdes Equo), Joaquín Palacín (CHA), Isaura Navarro (Compromís) y Pedro Santisteve, alcalde de Zaragoza entre 2015 y 2019 en a coalición municipalista Zaragoza en Común. Será moderada per lo periodista Chema López Juderías, y tratará sobre “cómo consolidar alternativas dende la ezquierda frent a l'abance d'as dreitas”, y se charrará de chusticia social, sostenibilidad y “cómo construyir alianzas que de verdat connecten con as necesidaz d'a ciudadanía”.
Finalment, representants d'as cuatros formacions zarrarán la chornada con uns breus discursos pa “reflexionar sobre las alianzas territorials y los retos que nos asperan pa 2027”. Participarán Amparo Piquer, secretària cheneral de Més - Compromís, Pedro Santisteve, Mar González, coportavoz federal de Verdes Equo, y Joaquín Palacín, president nacional de CHA.
L'acto se ferá este sabado, 25 de chinero, a partir d'as 10:00 horas, en o Centro Civico Delicias, en l'Avenida de Navarra 54 de Zaragoza, con dentrada libre previa inscripción en este formulario, per motivos de aforo.
