Chunta Aragonesista ha celebrau este sabado lo suyo Comité Nazional, maximo órgano entre Asambleyas, y ha ratificau a Jorge Pueyo “como candidato a la Presidencia d'Aragón pa las eslecions d'o 8 de febrero”.
“No i hai mayor orgullo pa un aragonesista que formar parte d'as Corz d'Aragón. Puedo afirmar, con tota la sinceridat d'o mundo, que no he pasau un menuto en Madrit en o cual toz los míos pensamientos no estasen mesos en Aragón. Mientres, veyemos cómo a atros politicos aragoneses les ocurre chusto lo contrario, dedicando-se a utilizar Aragón con o solo obchectivo de medrar en Madrit”, ha afirmau Pueyo.
Lo candidato de CHA ‘a la presidencia d'Aragón’ ha sinyalau tamién que “cuan yes en o Congreso te das cuenta d'a importancia que en Aragón i haiga politicos que prioricen y esfiendan Aragón”, como tienen atros países y territorios, “viengo con mas experiencia, con mas responsabilidat y sabendo cómo funcionan los equilibrios d'o Estau y la necesidat que Aragón tienga un partiu fuerte que esfienda a la suya chent”.
“Azcón me tiene ganas. Yo a él tamién”
“Sé que Azcón me tiene ganas. Yo a él tamién, pero sobre tot, tiengo ganas d'acabar con as suyas politicas privatizadoras, extractivistas y covardas. Aragón se le la chuga lo 8 de febrero, y no podébanos quedar-nos mirando sin fer cosa. Ye la hora d'Aragón”, ha recalcau Pueyo.
L'encara deputau en o Congreso, encabezará la lista per la circumscripción de Zaragoza, mientres que Verónica Villagrasa, secretaria territorial de l'Alto Aragón, liderará la de Uesca, y Javier Carbó, secretario territorial d'as Comarcas d'o sud d'o país, la de Teruel “dimpués d'haber obteniu la confianza d'a militancia en o proceso de primarias”.
Lo Comité Nazional de CHA ha ratificau tamién las listas electorals pa la cita electoral. En Zaragoza, Jorge Pueyo será acompanyau d'Isabel Lasobras, Miguel Jaime, Mary Carmen Bozal y Adrián Tello, dica un total de 35 personas. En l'Alto Aragón, chunto a Verónica Villagrasa serán Mascún Ariste, Laura Climente, José Luis Parra y Nuria Ortega en una lista de 18 candidatos y candidatas. Y en Teruel, la candidatura de 14 personas será encabezada per Javier Carbó, Pilar Martín, Jorge Rodríguez, Pepa Nogué y Eduardo Alcutén.
Per la suya parte, la secretaria cheneral de CHA, Isabel Lasobras, ha agradeixiu “a totas las personas que han dau un paso adebant pa representar a Chunta Aragonesista, dentro d'unas candidaturas que son fruto d'un dialogo intenso entre totas las sensibilidaz de CHA que s'ha caracterizado per la gran chenerosidat pa plegar a acuerdos per lo bien d'os aragoneses y aragonesas”.
“Hue, Chunta Aragonesista ye mas cohesionada que nunca. Encetamos la nuestra campanya electoral con muitismas ganas de treballar per Aragón y de recorrer-lo de nuevo, municipio a municipio, persona a persona, como levamos fendo dende fa 40 anyos”, ha anyadiu.
Amás, Lasobras ha explicau que “las listas aprebadas hue contan con representants d'atras organizacions como Choventut Aragonesista, Estau Aragonés, Recortes 0 y personas independients, amás de l'alcuerdo aconseguiu con o Partiu Verde (Equo)”.
Lasobras ha explicau que “no empecipiamos de zero. Contamos con o gran treballo que realizan cada día totas las personas que represientan a CHA dende nuestras concejalías, alcaldías y consellos comarcals. Gracias a éls y ellas conoixer-nos las necesidaz de toz los lugars d'Aragón, que plasmaremos proximament en o nuestro programa electoral, que ya hemos prencipiau a elaborar”.
“Hue presentamos a este grupo d'hombres y mullers de diferents edaz, d'o medio rural y urbano, plurals y diversas, pa seguir estando lo partiu de referencia d'as personas progresistas y aragonesistas. Hue somos la verdadera candidatura útil de esquerdas, an se engloban totas las sensibilidaz. Y este proximo 8 de febrero, imos a levar ixa ilusión a las urnas pa movilizar la participación y construyir una mayoría de cambio que faiga frent a las politicas d'Azcón y la ultraderecha”, ha finalizau Isabel Lasobras.
