CHA ha incluyiu, entre as esmiendas rechistradas por lo Grupo Plurinacional Sumar d’o Congreso d’os Deputaus y Deputadas a lo prochecto de Lei d’o Cine y la Cultura Audiovisual, quantas esmiendas “ta fomentar la cinematografía y l’audiovisual en luengas reconoixidas estatutariament, encara que no sían cooficials, como ye lo caso de l’aragonés u de l’asturianu, asinas como ta aduyar a las salas de cine en lo medio rural ta guarenciar la equidat territorial en l’acceso a la cultura cinematografica”.
A propuesta de CHA, lo Fondo ta lo fomento d’a cinematografía y l’audiovisual en luengas oficials distintas d’o castellano reservará un minimo d’o 5% ta “las luengas reconoixidas estatutariament d’as comunidatz autonomas”.
Iste fondo, destinau a “fomentar lo desembolique de prochectos, la producción, la distribución, la exhibición, la restauración y la promoción d’a cinematografía y de l’audiovisual en luenga oficial distinta d’o castellano y en luengas reconoixidas estatutariament d’as comunidatz autonomas”, s’articula a partir de convenios d’o Ministerio de Cultura con países como lo nuestro con luenga propia, y la contribución estatal se calcula en proporción a las aportacions de cada país “a lo fomento d’o cine en a suya luenga en l’eixercicio immediatament anterior”.
Amás, ixe Fondo, que antes dependeba d’os limites presupuestarios en cada eixercicio, a propuesta de CHA “será dotau con una cuantía d’a lo menos lo 10% d’os recursos destinatos a lo Fondo de Protección a la Cinematografía”, que ye lo fondo que alministra l’Instituto d’a Cinematografía y las Artes Audiovisuals (ICAA). “D’ista traza, se guarencia la estabilidat d’o fondo ta las luengas, que no queda a l’albur d’os vaivens presupuestarios de cada anyo”, remarcan dende la formación aragonesista.
Finalment, CHA tamién ha promoviu una esmienda en favor d’as salas de cine d’o medio rural, con o texto siguient: “En o marco d’as politicas ta fer frent a la despoblación y a lo repte demografico, se podrán establir, en colaboración con as comunidatz autonomas, aduyas a las salas y retz de salas d’exhibición cinematografica en lo medio rural con l’obchectivo de guarenciar la equidat territorial en l’acceso a la cultura cinematografica”.
