Dende CHA-L’Almunia explican que “con motivo d'o prochecto de construcción d'un Centro Cultural Islamico, publicoron -Vox- un comunicau pleno d'afirmacions, insinuacions y preguntas retoricas disenyadas pa chenerar alarma social, desconfianza y un profundo sentimiento d'hostilidat enta la comunidat islamica y, per extensión, enta las personas d'orichen inmigrante”.
José Manuel Latorre ha detallau que “lo pasau 24 de noviembre publicoron -Vox- en o suyo perfil oficial de facebook un comunicau que, baixo una aparent critica urbanistica y de chestión municipal, conteneba en realidat una serie d'afirmacions, insinuacions y preguntas retoricas disenyadas pa chenerar alarma social, desconfianza y un profundo sentimiento d'hostilidat enta la comunidat islamica, que existe en L’Almunia dende fa mas de 25 anyos y, per extensión, enta las personas d'orichen inmigrante”.
“Tal como se constató en a Chunta de Portavoces urchent, yera falso que lo solar fuera de titularidat municipal u que heba estau cediu per lo Concello, cuan la realidat, conoixida per toz los grupos municipals, ye que se trata d'una parcela de titularidat privada, adquirida per la comunidat islamica de L’Almunia,”, aclareix.
Pa lo portavoz de CHA, “estas falsedades, unidas a las insinuacions y acusacions veiladas, teneban como sola fin chenerar un estau d'inquietut, malestar y refuso entre los vecins de L’Almunia, no nomás enta lo prochecto, sino dreitament enta la comunidat islamica resident en o municipio, asociando-la con valors antidemocraticas, lo extremismo y la inseguridat”.
Debant de “la gravedat d'os feitos”, los portavoces, con a exclusión de Vox, profés, alcordoron “publicar un comunicau conchunto pa aclarir los termins d'o escrito de Vox y desmentir la información falsa, amás de comunicar formalment que lo suyo escrito podría tener consecuencias legals”.
“Como consecuencia, dito grupo -Vox- emitió una nota-aclaración, en a cuala rectificaba la información sobre la titularidat d'o solar, pero esbarraba lo foco enta un discurso politico de confrontación identitaria y manteneba insinuacions grieus, per lo que podría estar considerau como una pieza mas en a estratechia de fomento indirecto d'a hostilidat y la discriminación”, anyade lo portavoz de CHA.
Finalment, José Manuel Latorre ha sinyalau que “no podemos callar frent a lo discurso de l'odio, hemos de fer frent a qui tratan de sembrar dudas y alerta, alterando la convivencia vecinal y sanfoina en L’Almunia y en a resta de municipios d'Aragón”.
