CHA manifiesta publicament “la suya mas profunda condena debant d'a ola de violencia machista que ha trucau a la nuestra sociedat entre este verano”. Dica 15 mullers han estau asasinadas en este periodo en o Estau espanyol “a lo que se suman los crímens de tres menors d'edat y lo asesinato d'a mai d'as victimas. Toz estes terribles crímens requieren d'urchencia d'una respuesta firme y contundent”, enfantizan.
De feito, lo numero de mullers asasinadas per lo terrorismo machista en 2024 en o Estau espanyol asciende a 31 dica la calendata, sumando un total de 1.275 dende 2003. Dramaticas cifras a las cualas s'anyaden dica diez ninos y ninas victimas mortals d'a violencia vicaria en 2024, aconseguindo un total de 63 dende 2013.
“En o que va de verano de 2024, la violencia machista ha arrebatado la vida de mullers en diversos territorios: Andalucía, País Valencià, Catalunya, Madrit, Castiella y Leyón, Galiza y Castiella-La Mancha, reflectando la extensión y gravedat d'esta lacra social”, destacan dende CHA.
Per ixo, la formación aragonesista fa “un clamamiento urchent a lo Partiu Popular pa que elimine de radiz cualsequier vestigio de negacionismo en as suyas politicas dimpués d'a ruptura de pactos con Vox, formación que ha contrimostrau de traza reiterada lo suyo refuso a las politicas de protección y reconoixencia d'a violencia de chenero”.
“Lo negacionismo y la minimización d'a violencia machista no nomás perpetúan la dolor d'as victimas y las suyas familias, sino que tamién debilitan os esfuerzos colectivos pa erradicar esta grieu violación d'os dreitos humans”, recalca Isabel Giménez Uliaque, secretaria de Feminismos de CHA.
“Los asesinatos son la manifestación mas extrema d'a violencia de chenero, pero no son los solos episodios de brutalidat rechistraus este verano. Numerosos casos d'agresions grieus y menazas s'han succediu en tot este periodo”, recuerdan dende CHA.
“Reiteramos lo nuestro compromiso en la luita contra la violencia machista y exichimos a totas las fuerzas politicas que treballen de traza unida y decidida pa protecher a las victimas, asegurar la enchegada de politicas efectivas y reclamamos refusar cualsequier discurso que niegue u minimice esta realidat devastadora. No podemos permitir que la vida de mas mullers y menors sía truncada per l'odio y la violencia. Ye hora d'actuar con contundencia y responsabilidat”, conluye Giménez Uliaque.
