A formación aragonesista CHA celebra que, en o marco d’as negociacions presupuestarias d’iste partido con o Gubierno de l’Estau espanyol, o Ministerio de Cultura ha aprebau duplicar a subvención nominativa en favor de l’Academia Aragonesa d’a Luenga ta la realización de prochectos culturals en aragonés y en catalán d’Aragón, que pasará de 50.000 a 100.000 euros.
Lo president de CHA, Jorge Pueyo, s’ha felicitau por haber conseguiu iste acuerdo que prolonga y enfonda en o lograu en l’eixercicio presupuestario anterior, subrayando que “que l’Estau reconoixca os dreitos lingüisticos d’os aragoneses y aragonesas ye una buena noticia que lanza un mensache muit claro a o nuevo Gubierno d’Aragón: as luengas d’Aragón no reblan debant d’a censura de PP y Vox, e igual como empedimos que rematasen con o Festival Periferias, empediremos que rematen con as nuestras luengas”.
“Con isto, contrarrestamos a invisibilización y o negacionismo d’o gubierno PP-Vox enta as nuestras luengas: dende que plegó Azcón ta lo Pignatelli eliminaron a Dirección Cheneral de Politica Lingüistica d'a DChA, han deixau sin fondos a l’Academia Aragonesa d’a Luenga, insisten en negar o reconoiximiento digno ta las nuestras luengas, etc. Y agora pretenden expulsar-las d’as escuelas, extirpar o catalán d’as comarcas aragonesas an se charra dende fa sieglos y eliminar l’Institut Aragonès del Català. Por ixo, agradeixemos especialment a o Ministerio de Cultura la suya sensibilidat y o suyo refirme, porque con ista medida se garantiza que continará habendo fondos ta actividatz culturals en aragonés y en catalán d’Aragón”, recalca Pueyo.
Asinas mesmo, recuerda que “as nuestras luengas son patrimonio inmaterial de totz os aragoneses y aragonesas, las charren u no, pero tamién de tota la humanidat. Son a nuestra traza unica de veyer y entender o mundo. No tienen color politico, son de totz y totas, y cualsiquier que ataque as nuestras luengas ataca a tota la ciudanía aragonesa. Haber conseguiu iste acuerdo ye un motivo d’argüello, y va por totz aquells que ya no i son y nos amostroron o camín y ye fuent d’esperanza ta totz aquells a os quals queremos legar iste patrimonio”.
Finalment, o president nacional de CHA ha afirmau que “hue se da un paso más ta cumplir con o Estatuto, con a Constitución y con a Carta Europea d’as Luengas Minoritarias. Fa tristura que l’Estau espanyol tienga más preocupación por o patrimonio aragonés que o propio Gubierno d’Aragón, secuestrau por as politicas d’asimilacionismo cultural de Vox, que emplega as luengas como arma politica. Y ye que, d’a mesma traza que lo denunciamos quan belún emplega o patrimonio material como arma politica, no permitiremos que dengún lo faiga con o patrimonio inmaterial”.
