Toz dos sindicatos denuncioron en o mes d'abril l'aprebación per parte d'o Gubierno d'Aragón d'as ensenyanzas de Grau Meyo en o colechio concertado Escuelas Pías de Chaca “habendo un centro publico que heba presentau prochecto en o cual, amás, ya se yeran desenvolvendo las ensenyanzas de FP basica”, aseveran dende CCOO y CGT.
Lo centro de Samianigo realizó una propuesta a lo Departamento d'Educación d'a DChA “pa dar continuidat a la FP Basica” que ya tienen “implantada y consolidada con personal funcionario de carrera”. Lo prochecto d'o centro contaba con l'emparo d'entidaz d'a redolada pa realizar las practicas y espacios potencials pa poder estar acondicionaus. Manimenos, lo Departamento d'Educación “decidió no tener en cuenta dita solicitut, a la cuala a día de hue encara no ha respondiu, y conceder las ensenyanzas a lo colechio Escuelas Pías de Chaca, quedando pendient determinar si se trataría d'unas ensenyanzas privadas u concertadas”, sinyalan los sindicatos.
CGT y CCOO denuncian que finalment “lo Grau Meyo será concertado, tal como amaneixe en a pachina web d'o centro privau, bella cosa totalment intolerable ya que lo Gubierno d'Aragón va a invertir diners publicos a favor d'interpresas privadas y d'o centro concertado”, enfatizan. “Lo Colechio Escuelas Pías de Chaca no conta con cocinas industrials pa lo desembolique d'as practicas, las cualas s'habrán de realizar en interpresas privadas, asumindo lo Departamento d'Educación ditos costes, u invertir diners publicos pa la construcción d'as mesmas”, detallan os sindicatos, que denuncian tamién “que se trata d'un malfurrio inaceptable d'os diners publicos y mas, cuan la propuesta d'o IES Biello Aragón de Samianigo contaba con cocinas industrials publicas pa lo desembolique d'as practicas”.
Per ixo, toz dos sindicatos exichen a lo Departamento d'Educación d'a DChA “una rectificación y una inversión coherent d'os recursos publicos. Los diners que lo Gubierno d'Aragón presuposada curso dimpués de curso pa la educación publica ye insuficient y no podemos tolerar que, amás, se malfurrien os diners”, recalcan.
“La educación no ye un negocio. Menos sinyaturas de convenios pa utilizar diners publicos en iniciativas privadas y mas responsabilidat en a chestión de recursos pa la publica, la de totas y toz”, concluyen.
