ARREDOL | A presidenta Luisa Fernanda Rudi ha anunciau o meyodiya d’iste pasado chueves o cese de Jose Luis Saz como conseller de Hacienda y Administración Publica, dimpués de que iste le presentase a suya dimisión. Iste cambio en o gubierno plega bell diya dimpués de conoixer-se que o deficit publico aragonés no cumplió l’ochectivo fixau d’o 1,3%, en plegar dica un 2,06 en l’exercicio 2013.
O nuevo conseller de Hicienda será Javier Campoy Monreal, qui estió conceller de Maella entre 1999 y 2003, por o PP, y que agora mesmo ye diputau en as Cortes y Secretario d’o Partiu Popular en Zaragoza. De vez, a presidenta ha anunciau atros cambios en iste y atros departamentos. A directora cheneral de presupuestos María del Rosario Carnicer Berga, deixa tamién o puesto. Encara no bi ha sustituta, quedando o cargo baixo lo criterio d’o nuevo conseller.
En l’aria de Sanidat, Rudi ha anunciau os nombramientos de Ángel Sanz Barea como cherent d’o SALUD, y de Jose Ignacio Castaño Lasaosa como cherent de l’hespital Miguel Servet y de os sectors sanitarios I y II. Istas dos personas plegan a sustituyir a Maria Ángeles Alcutén y Jose Huelin, primers mundidius d’a resestructuración ahiere.
A presidenta ha dito que no ha valorau a posibilidat de cesar a Ricardo Oliván, conseller de sanidat. Tamién ha esfendiu a chestión de Jose Luis Saz, que no considera “garra fracaso”. Antimás, encara que admite haber superau l’obchectivo de deficit imposau, Rudi ha esfendiu que as cifras d’os gubiernos espanyol y aragonés no cuadran. Entre que o primer sinyala un deficit de 254 millons d’euros, o gubierno aragonés baixa la cifra dica los 81 millons.
