L'Asociación Tinkunakama leva ya un anyo prochectando peliculas ambientadas en Bolivia ta recaudar fundos t'os ninos d'o 'Fogar Creamos' de Cochabamba, Bolivia. O venient sabado 22 de febrero prochectarán a las 19.00 horas o filme 'Blackthorn, sin destino' en o CSA A Enrestida (callizo Santo Cristobal, vico d'a Madalena, Zaragoza).
A dentrada costará 1 euro y os diners obtenius d'a venda d'istas, refrescos y palometas de panizo, asinas como d'a birolla y artesanía irá destinau integrament t'o fogar infantil. A totz aquells que amás colaboren levando-ie un minimo de 5 bolígrafos u rotuladors gastaus se les convidará a un refresco.
Blackthorn, sin destino
Dimpués d'a suya fuyida d'os Estaus Unius, o lechendario forachido Butch Cassidy y o suyo amigo Sundance Kid murioron en Bolivia en 1908, en un tiroteo. Isto ye o que diz a versión oficial. Iste film, en cambeo, nos amuestra que, dimpués de vivir amagau mientras vinte anyos, o que Cassidy deseyaba yera tornar t'o suyo país. Manimenos, quan conoixe a un choven inchenier espanyol que plega de rapar una mina que perteneixe a l'interpresario mas important de Bolivia, cambea os suyos plans.
