Este agüerro, d’o 16 a o 18 d’octubre Bielsa acullirá as I Chornatas de l’Aragonés, una iniciativa que naix con o proposito d’achuntar en o territorio a personas vinculadas dende diferents ambitos a la luenga aragonesa y chenerar un espacio d’encuentro, reflexión y intercambio arredol d’a suya realidat actual. Lo Centro d’Estudios de Sobrarbe (CES), l’Instituto de Estudios Altoaragoneses y l’Instituto de l’Aragonés de l’Academia Aragonesa de la Luenga impulsan estas primeras chornatas con a colaboración del Concello de Bielsa.
Durant tres días especialistas, charradors, escritores, editors y publico interesado compartirán ponencias, charlas y coloquios, chunto con propuestas vinculadas con o cine, a literatura y a musica. “Queremos que estas chornatas sigan estando, principalment, un puesto ta trobar-nos y ascuitar-nos, y fer-lo amás en o territorio, cerca d’as personas y d’os lugars a on l’aragonés contina formando parte d’a vida y d’a memoria colectivas”, sinyala o president d’o Centro d’Estudios de Sobrarbe, Andreu Lascorz. “Por ixo, animamos a participar tanto a qui charra aragonés como a qui lo estudia, treballa por a suya difusión u, sencillament, tiene interés por conoixer millor a nuestra luenga y a suya realidat actual”, adhibe.
A programación prencipiará o viernes 16, a las 18:00 horas, en a Sala d’a Casa d’a Villa de Bielsa con a proyección d’o premiato largometraxe de Maxi Campo 21.000 palabras (un cabezuto e dos collons). A sesión contará con a presencia d’o director y d’o suyo protagonista, Ánchel Lois Saludas (Barre), y continará con una charrada moderata por Chabi Lozano. O sabado concentrará buena parte d’a programación. A las 10:30 horas tendrá lugar a presentación oficial d’as Chornatas, a cargo d’Andreu Lascorz y Juan Pablo Martínez, director de l’Academia Aragonesa de la Luenga. A continuación, l’escritor e investigador Fernando Romanos abordará l’estato actual d’o idioma aragonés.
Un d’os momentos centrals arribará a meyodía con diferents charradas, moderatas tamién por Romanos, en as que vecins y vecinas de diferents lugars d’o Pirineu compartirán as suyas experiencias arredol de l’uso de l’aragonés, acercando a os asistents as voces d’aquels territorios a on a luenga encara mantién presencia. Por a tarde, Juan Pablo Martínez ufriará una nueva charrada en representación de l’Academia Aragonesa de la Luenga. A literatura tendrá, igualment, un espacio destacato de a mano d’as editorials Xordica y Gara d’Edizions, acercando a o publico a creyación y edición en aragonés. A chornada rematará con un concierto d’Ensamble en aragonés y una cena ta la qual será menester inscribir-se previamente.
“O domingo 18 meteremos o broche a esta primera edición con una visita cultural y una paradeta de venta de libros en aragonés”, explica o president d’o CES, a o mesmo tiempo que fa un clamamiento convidando a acudir “a todas as personas que sientan curiosidat por l’aragonés y ganas de meter en valor, cada una dende as suyas posibilidatz, una luenga que ye parte d’a nuestra identidat y un recurso fundamental ta comprender millor a nuestra cultura, os nuestros lugars y, en definitiva, a nuestra esencia”.
As personas interesatas en participar en as I Chornatas de l’Aragonés pueden fer a suya inscripción a traviés d’o codigo QR incluyito en o cartel d’as chornatas u a traviés d’este enlace.
