Lo PSOE de l’Alto Aragón denuncia la “incapacidat y grieu falta de chestión” d’a Diputación de Uesca y d’o Gubierno d’Aragón dimpués de conoixer-se a liquidación provisional d’o convenio ta la millora d’infraestructuras educativas, que revela que mas d’o 36% d’os fondos previstos ta 2024 y 2025 ta colechios publicos d’o norte d’o país no s’han executau.
Lo PP, en a Diputación de Uesca y en o Gubierno d’Aragón, “ha deixau d’invertir mas de 360.000 euros en colechios publicos d’a provincia en os dos zagueros anyos”, asinas lo han denunciato en rueda de prensa Marcel Iglesias, diputado en as Cortz d’Aragón, y Enrique Pueyo, diputado en a DPU, que han criticau que “a incapacidat de chestión d’o PP en as institucions oscenses y aragonesas perchudica a os servicios publicos d’a provincia. Os afectaus a la fin somos totz os oscenses”, han asegurau.
O plan, financiato a partes iguals por ambas administracions, debería haber invertiu un millón d’euros en milloras en os colechios publicos d’o norte d’o país “pero seguntes os datos d’a propia DPU, s’han deixau mas de 360.000 euros sin chustificar, o que evidencia que una parte muit relevant d’os fondos comprometius no s’ha traduzito en milloras reals en os colechios”, han recalcau.
Dende o PSOE Alto Aragón consideran “inaceptable que ista situación se produzca en una provincia an que muitos colechios publicos presentan importants necesidades d’inversión, tanto en mantenimiento como en accesibilidat u adecuación d’instalacions”.
“Somos charrando de recursos publicos que hevan de servir ta millorar o día a día d’alumnau y docentes, y que s’han quedau sin executar por una clara falta de planificación y coordinación. Mientres os gubiernos d’o PP deixan d’invertir en a escuela publica, Azcón sale d’a suya paralisi nomás ta financiar a educación privada a traviés d’o concierto d’o Bachillerato”, ha enfatizau o portavoz d’o PSOE de l’Alto Aragón, Marcel Iglesias.
Amás amás, os socialistas critican a contradicción entre istes datos y os anuncios realizaus por o president d’a DPU, Isaac Claver, y a consellera d’Educación d’a DChA, Tomasa Hernández, en os quals se destacaba un aumento d’a inversión en infraestructuras educativas. “No se puede sacar peito fablando de mas presupuesto quan dimpués no se ye capaz d’executar-lo. A realidat ye que centenares de mils d’euros destinaus a colechios publicos s’han quedau en o camín”, ha sinyalau Iglesias.
Colegios de Graus, Chimillas y Fonz sin reformar
Asinas mesmo, o PSOE Alto Aragón sinyala tanto a la DPU como a lo Gubierno d’Aragón por a falta de coordinación. Enrique Pueyo ha reiterau que “anque o causant d’iste recorte en educación publica ye o gubierno d’Azcón, ye a DPU a que adelantó os fondos y debería haber velau por a suya correcta execución. Agora son colechios como os de Graus, Chimillas u Fonz os que s’han quedau con as reformas sin fer”.
En iste sentiu, recuerdan que a resolución contempla “o inicio d’un expediente ta reclamar a devolución de mas de 180.000 euros no chustificaus, que se corresponden con a parte no executada d’os 500.000 euros que corresponden a la institución provincial”, o que a chudicio d’os socialistas “confirma o fracaso en a chestión d’una parte sustancial d’o programa”.
“A educación publica no puede estar víctima d’a mala chestión. Cada euro que no s’invierte ye una oportunidat perdida ta millorar os nuestros colechios y garantizar un servicio educativo digno”, ha concluyiu Pueyo.
