La entidat Autismo Aragón s'une a la campanya per lo Día Mundial de Conscienciación sobre lo Autismo, que se conmemora cada 2 d'abril y que, este 2026, leva per lema “Menos chudicios. Mas apoyos”. Aliniada con a campanya “Not Invisible” de Autismo Europa, la propuesta anima a la ciudadanía “a deixar a un costau los prechudicios y los chudicios prematuros” y apela a la empatía.
Lo fa a traviés d'un video protagonizado per personas con autismo de distintas edaz y con diversas necesidaz d'emparo. La campanya d'este 2026 conta con a colaboración desinteresada de l'actriz y creyadora de conteniu Mara Jiménez.
“En cuenta de ‘sentenciar’ que belún ye borde, pesau u maleducado, la campanya proposa parar-se a pensar que, dezaga d'un comportamiento que no nos encaixa u que no s'achusta a las nuestras expectativas, puede haber una persona autista que ameneste nuestro emparo y la nuestra comprensión pa fer frent a una situación que le chenera malestar u que, simplement, no sabe chestionar”, desfienden dende lo movimiento asociativo.
Como parte d'esta campanya, Zaragoza tornará a sumar-se lo 2 d'abril a la iniciativa internacional iluminando d'azul cuantos espacios emblematicos entre las 21:00 y las 22:00 horas, como lo Palacio d'a Aljafería, y las fuents de Plaza Espanya, Parque Gran José Antonio Labordeta, Plaza d'o Pilar y Plaza Basilio Paraíso.
Una chornada inclusiva, l'11 d'abril, pa compartir, chugar y visibilizar
Autismo Aragón, celebrará la suya chornada de puertas ubiertas lo proximo 11 d'abril (en coincidir lo día 2 con a festividat de chueves santo). La convocatoria ubierta a tota la ciudadanía se fará d'11:00 a 13:00 horas en o Parque Roberto Camardiel Escudero d'o vico d'o Actur de Zaragoza, chunto a la sede de l'asociación.
Lo programa incluyirá chuegos inclusivos dinamizados per profesionals y voluntariau, l'actuación de machia “Maquina de sueños” de Miguel Ba, la visita d'o camión d’os Bombers de Zaragoza, y l'animación d'os cabezudos de l'Asociación Cultural Comparsa de Cabezudos L'Antiga Quimica L’Almozara. Tamién i habrá un espacio de venda solidaria con productos elaboraus en o taller Puntadas Azuls, empentau per familias d'a entidat.
La chornada ye concebida como un espacio de trobada ubierta a tota la ciudadanía, an compartir experiencias, trencar barreras y amanar la realidat d'o autismo dende una mirada positiva, accesible y participativa.
Autismo Aragón, un ret d'emparo pa las familias
Lo trestuco d'o espectro d'o autismo (TEA) ye una condición d'o neurodesarrollo que afecta a la configuración d'o sistema nervioso y a lo funcionamiento cerebral. Lo autismo se presienta de traza diferent en cada persona, pero totas comparten, con mayor u menor intensidat, dificultaz en o desembolique d'as habilidaz socials y comunicativas y presientan un comportamiento inflexible y con intereses repetitivos. No se conoixe l'orichen d'o autismo, pero se sabe que ye chenetico y que cualques factors ambientals (caracteristicas d'os prochenitors u eventos perinatales) contribuyen a lo suyo desembolique y evolución.
Las reivindicacions d'o colectivo meten lo foco especialment en o financiamiento, sostenibilidad y calidat de servicios pa los cuals encara existen barreras significativas. Muitas personas y familias enfrontinan largas listas d'aspera, falta de profesionals especializaus y una insuficiencia de recursos publicos que obliga a pagar estes apoyos esencials. Esta situación chenera desigualdades y mete en risgo lo buenpasar de muitas personas en o espectro d'o autismo.
Pa informar y atender a las familias afectadas, Autismo Aragón cuenta con un gran equipo de profesionals especializadas y voluntarias pa ofrir terapias y servicios d'emparo imprescindibles pa las personas con autismo y las suyas familias. Terapia ocupacional, orientación psicolochica y emparo social son beluns d'os servicios especializaus ofrius per Autismo Aragón, amás de tallers, musicoterapia u actividaz de ocio y tiempo libre, entre atras opcions.
Con mas de 25 anyos de trayectoria, Autismo Aragón ye una asociación que actualment conta con amán de 300 familias asociadas que luitan per la inclusión y per l'emparo mutuo.
