Arredol | O chicot lugarón d'Ascaso, en o Sobrarbe, celebra a suya segunda muestra de cine independient a l'aire libre.
Hue s’enguera a segunda edición d’a Muestra de Cine d’Ascaso, un lugarón que fa parte de Boltanya y en o que no viven que siet personas de contino. Dica o diya 31 se podrá disfrutar d’ista “chicota” muestra de cine independient, dificil de viyer en o mundo rural aragonés. Pese a estar encara sin enerchía electrica connectada a o ret y a o suyo dificil acceso por pista forestal, sin dubda, se podrá disfrutar d’una muestra de cine a l’aire libre baixo un cielo pleno d’estrelas, en no tener fuents de contaminación luminica.
Se prochectará en a muestra largometraches espanyols como “N-VI” (Pela del Álamo) u “Ander” (Roberto Castón); franceses como “Les Neiges du Kilimandjaro” (Robert Guédiguian, y que enguera ista nueit o festival) y “Le Tableau” (J. F. Laguionie); y un italiano “Io sono Li (A chicota Venecia)” (Andrea Segre). Con cada largometrache se ferá una rufierta dimpués que se retransmitirá por internet a traviés d’a pachina de 400films.
I habrá puesto pa curtometraches (o viernes) y tamién pa mosica, con l’actuación o sabado d’o cantautor Francho Sarrablo. Tamién se ferá ixe mesmo diya chenta popular y fiesta final. Han confirmau asistencia a la muestra directors como Roberto Castón, Pela del Álamo u Andrea Segre; actors como Josean Bengoetxea u politicos como a diputada d’as Cortz Valencianas Mónica Oltra.
Encara que no ye un festival competitivo, se concederá un premio, o Premio Ascaso 2013 pa lo preograma de Radio Nacional d’Espanya “El Séptimo Vicio” por a suya defensa d’o cine independient y por o suyo refirme a festivals chicotz de cine. O premio ye una escultura de l’artista sobrarbense Jesús Sanz, donada de baldes.
O festival, empentau por l’Asociación de Vecins y Vecinas “Los Relojes” d’Ascaso, tien un radiu presupuesto y os vecins y amigos han consiguiu refirmes comercials y aduyas en forma de servicios (prochectors, equipos, bebidas, peliculas, aloix, etc.) amás de rehabilitar a borda viella en a que se celebrarán as rufiertas y bella prochección gracias a la financiación mediant “crowfunding” por internet. O Concello de Boltanya ha amprau material y a Comarca de Sobrarbe ha editau a publicidat. Entremistanto, encara aguardan a respuesta sobre una subvención d’a Diputación de Uesca.
Pa mas información d’o festival, se puede visitar a suya pachina web.
