Arredol. A información en aragonés

A millor ferramienta d’a colonización cultural ye fer que os colonizaus quieran voluntariament estar-ne y refusen a suya propia cultura, abrazando firme a cultura colonizadera. Arredol leva ya quasi tres anyadas prebando de fer aturar ixo, metendo en valor a luenga aragonesa como ferramienta de comunicación tant valida como qualsiquier atra luenga “normal”. A tamás d’os diferents textos de leis de luengas, d’a lechislación que bi ha habiu y bi ha y d’as polidas declaracions d’os gubiernos d’Aragón que hemos teniu, a verdat ye que l’aragonés ha contau con un radiu u inexistent refirme d’as institucions. O movimiento en esfensa …

arredol2A millor ferramienta d’a colonización cultural ye fer que os colonizaus quieran voluntariament estar-ne y refusen a suya propia cultura, abrazando firme a cultura colonizadera. Arredol leva ya quasi tres anyadas prebando de fer aturar ixo, metendo en valor a luenga aragonesa como ferramienta de comunicación tant valida como qualsiquier atra luenga “normal”.

A tamás d’os diferents textos de leis de luengas, d’a lechislación que bi ha habiu y bi ha y d’as polidas declaracions d’os gubiernos d’Aragón que hemos teniu, a verdat ye que l’aragonés ha contau con un radiu u inexistent refirme d’as institucions. O movimiento en esfensa d’as luengas, y os fablants concienciaus d’aragonés, han habiu d’esfender a luenga a pur de treballo firme y de muita paciencia y pedagochía, concarando-se con qui quieren imposar a luenga y cultura hechemonica u simplament deixar amortar-se una luenga y cultura de más d’un millar d’anyos d’historia. S’han feito muitas errors por o camín, prou que sí. Pero tamién s’ha conseguiu, mientres as zaguers quaranta anyadas, fer que una parte important d’a sociedat aragonesa conoixca y s’intrese por ista luenga nuestra, siempre en as tres pedretas. Una sociedat que sí que demanda a lo poder publico que refirme a l’aragonés.

Dende ixa militancia cultural naixió Arredol.Un prochecto endrezau a fer vistero l’aragonés y a alportar a nuestra parte en ixe “poder vivir en aragonés” que tantos fablants de tot Aragón deseyamos. Arredol preba de fer plegar noticias de toda mena a os aragonesofablants. Lo que en qualsiquier atra luenga sería lo normal, en aragonés esdeviene revolucionario. Porque en o mundo que preban de globalizar-nos, apostar por a expresión lingüistica más chicota d’ista parte d’a planeta ye revolucionario.

No tener medios de comunicación en a luenga propia, ye un d’os mayors problemas que concaran as luengas minorizatas. As colonizaderas, manimenos, se caracterizan por lo contrario: tener una fuerte presencia publica y mediatica. Arredol no ye, ni preba d’estar, un medio de comunicación de masas. Pero sí que prebamos de crebar a incomunicación entre totz y todas as fablants de l’aragonés y de fer plegar a realidat d’Aragón en ista luenga.

Tamién prebamos de dar treslada d’ixas noticias chiquetas, que amagan u “ixublidan” ixos grans medios de comunicación. Y prou que sí, de toda la actualidat en o mundo d’as luengas, que tant poco apareixe en ixos puestos.

Prebar de fer periodismo en a luenga más chicota d’Europa, con una comunidat de fablants prou chiqueta y con totz os problemas que bi ha cuanto a la normalización y normativización d’a luenga, tien toda mena de particularidatz, que no s’han de concarar dende a resta de meyos de comunicación, que no han de fer-se masiau (u mesmo mica) por istos afers.

Haber de trigar un modelo grafico, y mesmo un modelo de luenga, en una que no tien una autoridat lingüistica universalment reconoixida, ye atro d’os entrepuces que hemos teniu. A decisión presa aluenya a bells sectors. Mesmo hemos teniu bell boicot por ista qüestion. Con tot y con ixo, preniemos y continamos firmes en a nuestra decisión, metendo por dencima de tot a pervivencia d’a luenga.

Ixa falta d’autoridat ye, d’atra man, una oportunidat ta qui femos cada diya Arredol. Una oportunidat d’aprender, de afundar en os nuestros conoiximientos d’a luenga, de debatir sobre cadaguna d’as parolas que i escribimos d’ixamplar l’aragonés que totz charramos y que as nuestras lectoras y lectors fan servir.

Arredol

Arredol lo femos qualques personas vincladas dende a-saber-los anyos con a luita por l'aragonés y atras luengas minorizatas, personas que queremos que a nuestra luenga recupere a dignidat que mereixe, por estar una traza de expresar-se, por estar parte d'una cultura, por estar parte d'as nuestras vidas y de mils de personas que la fan servir, y asperemos que cada vegada mas.

Somos personas que venimos tamién d'atros medios de comunicación como as radios libres u a televisión y sabemos d'a importancia d'os medios libres de comunicación t'a nuestra luenga que no cuenta encara con a posibilidat de salir en medios oficials u privaus.

Somos unatra traza mas de fer vistero l'aragonés, como atros prochectos existents en o ret u en atros medios libres, y como atros nuevos prochectos que asperemos que amaneixcan.

Arredol | Para el Especial ‘Medios libres. Quiénes son y cómo trabajan’

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies