Entrevista a Arnaldo Otegi: “A garchola fa honra ta fer grans os chicotz suenios”

Arnaldo Otegi Mondragon -Elgoibar, 6 de chulio de 1958- ye un politico vasco, independentista y marxista, ex portavoz de Batasuna y ex parlamentario vasco de Herri Batasuna y Euskal Herritarrok. Actualment ye engarcholau por o estau espanyol en o Centro Penitenciario de Logroño. A suya situación de privación de libertat y a suya important influencia en a politica vasca y en a cucha europea dan a ista entrevista una alta valor informativa. Quí ye Arnaldo Otegi? Tractar de definir-se a uno mesmo leva dificultatz evidents en a mida en que as marguins d'a respuesta se mueven necesariament entre a vanidat …

Foto: Arnaldo Otegi
Foto: Arnaldo Otegi
Foto: Arnaldo Otegi

Arnaldo Otegi Mondragon -Elgoibar, 6 de chulio de 1958- ye un politico vasco, independentista y marxista, ex portavoz de Batasuna y ex parlamentario vasco de Herri Batasuna y Euskal Herritarrok. Actualment ye engarcholau por o estau espanyol en o Centro Penitenciario de Logroño. A suya situación de privación de libertat y a suya important influencia en a politica vasca y en a cucha europea dan a ista entrevista una alta valor informativa.

Quí ye Arnaldo Otegi?

Tractar de definir-se a uno mesmo leva dificultatz evidents en a mida en que as marguins d'a respuesta se mueven necesariament entre a vanidat y a necesaria inclinación ent'a modestia. Digamos sencillament que paso por estar un militant vasco que con os suyos defectos y as suyas virtutz se siente de raso compromeso con a causa d'a libertat y d'a igualdat.

Qué ye Sortu?

Sortu ye a conseqüencia politica y organizativa d'o cambeo en a estratechia planteyada por a Cucha Abertzale. En ixe sentiu quiere aspirar a convertir-se en a casa comuna y a referencia de totz y todas aquellas vascas que aspiran a construir un Estau Vasco en Europa dende una posición de cucha.

A suya elección como secretaire cheneral de Sortu ye un signo de normalidat democratica u un desafío a o poder?

Creya-me si le digo, que os independentistas vascos no prenemos as nuestras decisions en función de si agradará u no a l’Estau. Asinas que no buscamos ni l'autorización de l’Estau ta prener-las, ni lo femos en función de buscar deliberadament agraviar ni ferir a dengún. As nuestras decisions nomás buscan obtener o refirme mayoritario d'o Pueblo Vasco a la nuestra achenda independentista y socialista. O nuestro unico desafío ye a libertat y a igualdat.

Por qué no ye vusté en libertat?

A nuestra permanencia en prisión nomás puede estar entendida en termins politicos. En termins churidicos l'exercicio podría estar resuelto por un estudiant de Dreito en o suyo primer curso en o sentiu de que ye de tot inconcebible (atendendo por eixemplo a la doctrina d'o TTDD Humanos d'Estrasburgo) que con un 40% d'o Tribunal supremo (2 sobre 5) manifestando ni mas ni menos que no teniemos un chuicio imparcial... a nuestra libertat seria immediata. En qualsiquier caso ya le abanzo que o nuevo Tribunal Constitucional (que en a prensa de l’Estau ha estau saludau con titulars como: O gubierno s'asegura o control d'o nuevo TC) no nos concederá un amparo que repito en termins churidicos ye d'obligau cumplimiento. Asinas que os enemigos d'a Paz continan pensando que a nuestra decidida apuesta por profundizar en as vías pacificas y democraticas ye menos periglosa t'os suyos intreses mantenendo-nos en prisión que estando en libertat.

Quál ye o papel de Sortu en o proceso de normalización politica d'o País Vasco?

Agora mesmo creigo que a gran aportación que habría de planteyar Sortu sería a de meter dencima d'a mesa d'o conchunto de sectors politicos, socials y sindicals comprometius con o proceso de solucions un abanico d'iniciativas que con caracter unilateral sortiasen y neutralizasen a evident estratechia de bloqueu, colapso y guerra psicolochica que l’Estau tien planteyada en Euskal Herria. Isto permitiría tornar o protagonismo atra vegada a o Pueblo Vasco, unico destinatario y protagonista posible d'iste proceso de solucions y de liberación nacional y social.

Nuevos nombres, nuevas siglas, pero, qué tien Sortu de nuevo?

Yo no entiendo Sortu como una obra rematada en termins politicos u organizativos. Estoi que encara somos en un periodo de transición. Encara amenistamos alterar en gran mida a nuestra mentalidat y cultura politica. A gran novedat que yo aspero de Sortu ye que sigamos capables d'introducir una nueva cultura politica en o nuestro País. Y ixo nos exichirá aleixar-nos d'o partidismo por un costau, y autoconstruir-nos como referent en termins de participación democratica por atro. Creigo que istos dos factors serán decisivos en o nuestro exito u nuestro fracaso.

Por qué ixa contina refundación d'o movimiento abertzale, con nuevos partius y plataformas politicas?

Ta entender-lo yo pararía cuenta en dos factors: a contina represión por un costau y a enorme vitalidat, imachinación y creyatividat d'o Movimiento Popular Independentista y de Cucha por atro.

Siempre asociamos a o nacionalismo vasco de cuchas con independentismo, pero, qué proposas politicas t'os ciudadanos i hai dezaga de Sortu, amás d'a reclamación soberanista?

Somos una organización socialista, somos marxistas... y sin poder entrar a o detall d'o nuestro programa (que ye publico) le diré que en termins de filosofía politica y frent a la ideolochía neoliberal nusatros consideramos que tot ser humano por o feito d'estar-ne debe tener guaranciaus por parte de l’Estau todas as suyas necesidatz basicas: educación, vivienda , sanidat, alimentación, paridat de chenero... etc. y amás totz os Pueblos d'o Mundo han de tener o dreito a decidir libre y democraticament o suyo futuro.

José Ángel Santos Laranga, Josu Leonet Azkune, Iñaki Totorika Vega... y asinas dica 856 victimas, caleban tantas muertes? Tenetz en o vuestro programa una mención a las victimas?

Debemos estar extremadament cudiadosos y respectuosos a la hora d'abordar o tema d'as victimas, ya que as nuestras parolas pueden encara chenerar una dolor adhibida. Independientment d'a existencia obchectiva de victimas en todas as partes a nusatros nos corresponde reconoixer a dolor causada como conseqüencia d'as nuestras decisions u os nuestros actos. Ixo ye bella cosa que ya hemos feito. Y le adhibo una zaguera reflexión: L'hemos feito sin asperar a que atros asuman as suyas propias responsabilidatz en o sufrimiento que han chenerau y que continan chenerando... L'hemos feito porque ye un exercicio de responsabilidat y honestidat que debemos a o nuestro Pueblo.

Fa meses ETA anuncio l'alto o fuego, deberían as asociacions de victimas deixar de recibir subvencions de l’estau, antiparte cada vegada menors?

Desconoixco os criterios y a quantía d'ixas subvenciones? Asinas que me permitirá responder-le que no seré yo qui planteye garra mena de retalle d'as mesmas.

Ye cierta ixa frase de Juan Marsé aplicada a o País Vasco que mientres no resolvamos o nuestro pasau, no tendremos futuro?

Soi firmement persuadiu de que en as sociedatz en que han desembolicau conflictos en termins violentos l'aproximación a un relato veraz de l’ocurriu exiche grans dosis de memoria y tamién de respecto. En o nuestro caso creigo que encara somos en una fase en a quala o relato d'o pasau pretende estar obchectivo d'imposición y d'instrumentalización t'o no alcuerdo y t'a no solución. L'aproximación a o pasau, a la memoria necesaria y a la trobada en o respecto son os unicos ingredients posibles ta construir un futuro diferent.

D'igual traza que a suya formación ha sinyau o manifiesto d'Ibaeta de refirme a os presos d'ETA, u ha participau en manifestacions en protesta por a muerte de miembros d'ETA, sería posible o cenyo de participar en manifestacions convocadas por as atras victimas?

Me consta que tanto os nuestros Parlamentarios y Parlamentarias en Gasteiz, como os nuestros alcaldes u o Deputau Cheneral han participau y mesmo organizau actos de memoria a las victimas en os quals han participau o conchunto de fuerzas politicas d'o País, incluiu o PP. Ixe ye un camín que seguiremos dica a final...

A violencia d'ETA ye condenable u ye chustificada ta aconseguir l'ansiada autodeterminación d'o pueblo vasco?

Quiero estar exichent, riguroso y coherent en a respuesta a la suya pregunta. ETA ha chustificau a suya existencia en o razonamiento de que no existen vías democraticas t'a consecución de prochectos politicos como l’independentista. En ixe contexto a Cucha Abertzale (que no ye ETA) mantenió una posición en a quala sin practicar, ni chustificar a violencia armada, sí contextualizaba a mesma como conseqüencia d'a falta de vías democraticas ta desembolicar determinaus prochectos politicos. Ixa posición nos ha costau decenios de represión, asesinatos d'Estau, garchola, tortura... y de vez tamién ha chenerau grans dosis de dolor y sufrimiento en a sociedat vasca y espanyola. Hue ye ta nusatros evident que ixas vías democraticas continan sin existir pero a nuestra firme decisión ye que a tamás d’ixo no se debe fer servir a violencia ta obtener resultaus politicos. Hemos amenistau muitos anyos ta instalar ixa reflexión en termins mayoritarios en a Cucha Abertzale. Y l'hemos aconseguiu. I hai qui diz y dirá que ista decisión nomás ye motivada por razons d'exclusiva eficacia politica... yo le aseguro que dimpués d'ista decisión existen grans dosis d'autocrítica y d'etica revolucionaria.

ETA ha deixau a luita armada?

Estió a nuestra decisión d'apostar unica y exclusivament por as vías pacificas y democraticas a que produció como conseqüencia a decisión d'ETA de dar por finalizada definitivament a luita armada. A irreversibilidat d'a nuestra decisión fa irreversible a decisión d'ETA.

En a constitución de l'actual parlamento espanyol o PP vetó que ERC y Amaiur podesen estar en a comisión de secretos oficials, A qué tien miedo o PP, ta que vete l'acceso a ista comisión?

O sistema capitalista amenista fer servir a mentira y a violencia ta continar subsistindo. A mentira y o miedo son os suyos ingredients basicos. Asinas que serianos muit inchenuos si pensasenos que os verdaders secretos d'estau son obchectivos de control por parte d'ixa comisión parlamentaria. A qui fan publicos os secretos d'Estau se les chudga por traición como ocurre con o soldau estadounidense acusau de filtrar os cables diplomaticos a Wikileaks... Por ixo qualsiquier información “sensible” debe estar amagada a os sectors que como o nuestro no tienen ni hipotecas ni compromisos inconfesables con o “establishment”.

Cómo van a estar agora as relacions entre Sortu y Bildu/Amaiur? Va a planteyar problemas ixa bicefalia en a representación?

No existe garra problema ya que o momento historico exiche a superación tanto d'as visions curtoplacistas como partidistas ta fer frent a os grans retos politicos: a Paz, a Independencia y una alternativa real a o modelo social que tracta d'imposar o neoliberalismo. En istos momentos t'as grans Alianzas Socials y Populars... y en ixa dirección o protagonismo prencipal le debe corresponder a EH Bildu como causa común de totz os sectors soberanistas y progresistas d'Euskal Herria.

Creye vusté que i hai un problema lingüistico en o País Vasco?

Le diré como primer consideración que no entiendo a qui planteyan o conoiximiento y uso d'una luenga como un problema. T'o mío, o conoiximiento d'o castellano u o francés amás de l'euskera ye una gran oportunidat y no un problema. A nuestra luenga nacional l'euskera que ya yera entre nusatros y nusatras a lo menos dende fa 30.000 anyos. Hue l’unico problema lingüistico real en Euskal Herria ye que vustés no trobarán garra adolescent que no sepa charrar castellano u francés dimpués d'a educación basica... y manimenos yo les podría presentar-ne decenas de mils que no conoixen l'euskera.

En Euskal Herria ha creixiu en zagueras a opción entre os chovens de votar a partius baixo as siglas d'a cucha aberztale como son Bildu en as municipals vascas y Amaiur en as chenerals. Que fa a un choven que va a votar por primer vegada con 18/19 anyos trigar a opción de Bildu/Amaiur? Ye un voto d'ideyals u de castigo a o sistema en ista situación de crisi?

Yo no comparto a tesi de qui piensan que a crisi civilizatoria que vivimos afecta nomás a l'ambito economico... En o terreno d’as ideyas y d'a politica asistimos a l'acotole d'una determinada traza d'entender a participación democratica. O futuro d'a Cucha nomás será posible dende posicions alternativas a o capitalismo y dende a participación democratica d'o conchunto d'os ciudadanos y d'as ciudadanas.

Creye Sortu que se puede mantener l’estau d’o bienestar? Vusté a qué politicas daría primacía?

L’Estau d'o Bienestar surte dimpués d'a II Guerra Mundial como conseqüencia d’a luita d'os treballadors por un costau y d'a temor d'a oligarquía a os procesos revolucionarios (como o d'a URSS) por atro. Desapareixiu o clamau bloque Socialista y proclamada a victoria total d'o capitalismo... as oligarquías pretenden recuperar o terreno perdiu en a suya taxa de ganancia. A crisi ye l'instrumento ta aconseguir ixe obchectivo. Lo quieren tot... y ta ixo amenistan desmantelar o publico en esquimen d’o privau. Frent a ixe obchectivo os socialistas vascos y vascas proclamamos que nomás o ser humano puede estar a mida de todas as cosas... y que a satisfacción d'as suyas necesidatz (cultural, sanidat...) debe estar l'obchectivo d'as politicas publicas.

O proceso de Paz que s'ubre agora con o refirme d'a mayoría de partius politicos menos UPyD que lo calificó d'una faltada ent'as victimas d'ETA, deixa a istas a un costau?

Qui fan ixas manifestacions no buscan a Paz soque un camatón de votos en as venients eleccions. Nusatros no pensamos en as venients eleccions soque en as venients cheneracions. Dengún no puede estar excluiu en un proceso de solucions.

En o suyo caso, ha mereixiu a pena tanto sufrimiento, tanto tiempo perdiu en a garchola?

He procurau y procuro que as mías estancias en prisión (que en a suya totalidat ya rondan os 11 anyos) no computen como un tiempo perdiu a traviés d'a reflexión, l’estudeo y a formación.

Quáls son os suenios d'Arnaldo Otegi?

A garchola fa honra ta fer grans os chicotz suenios. Agora mesmo poder fer una gambada con a mía familia a o canto d'o mar ye un gran suenio... que habrá d'asperar.

[Fuent: Arnaldotegi.com]

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies