Un 23 d'abril mas, Día Nacional d'Aragón, Alazetal, Aragón Despierta, Chunta Aragonesista, CUT, Estau Aragonés, Fundación Gaspar Torrente, OSTA, Partido Carlista, Renaixer, Rolde de estudios aragoneses y SOA promueven un comunicau conchunto, baixo lo titol "Aragonesismo activo. Aragón vivo". Lo texto l'han sinyau y leyiu entre l'acto celebrau este domingo en Zaragoza, en a plaza Aragón.
En o texto común, las organizacions firmantes desfienden "un Aragón mas solidario, mas libre, mas culto, mas diverso, mas dinamico y mas reivindicativo de lo propio, que potencie lo suyo paisache dende lo respecto d'as suyas qualidatz naturals con o nuestro meyo ambient".
Estas organizacions aragonesistas se definen como "diversas", tanto "per los nuestros ambitos d'actuación, como per las nuestras posicions ideolochicas", pero "nos une un elemento en común, que ye treballar pa Aragón y pa la ciudadanía aragonesa, practicando un aragonesismo activo en cadaguna d'as nuestras accions", apuntan en o comunicau.
"Somos aragonesistas, perque entendemos que fer las cosetas dende lo nuestro territorio ye siempre millor a que viengan atros dende la periferia a decidir sobre nusatros", anyaden. Amás, "siempre practicamos un aragonesismo dende la colaboración con atros territorios y atras chents, somos conscients que vivimos en una planeta que compartimos con muitas etnias, lugars, países, territorios, nacions con y sin estau y buenas y tamién malas chents".
En o texto remarcan que "este aragonesismo activo lo practicamos dende diversos ambitos: cultural, sindical, politico, social, educativo, personal y asociativo, lo femos en cadagún d'os espacios que habitamos".
"Somos l'aragonesismo politico, no podemos ixuplidar que qualques partius aragoneses han estau lo referent historico d'aragonesismo, y a lo largo d'o suyo trayectoria han sufierto fluctuacions en a suya representación en as institucions y tamién en a suya influencia social", afirman.
Sinyalan que "somos en un momento historico extranyo". "Cosa ye como creyebanos que yera y a la vegada s'ha instalau en a sociedat lo tot vale pa aconseguir los obchectivos, per ixo, cal tener cudiau con os advenedizos, partius d'ambito estatal que se dicen 'aragonesistas' pero que las decisions las prenen atros en Madrid, practican un aragonesismo electoral con o qual pretenden enganyar a la ciudadanía y ocupar un espacio que no les corresponde", advierten.
En este sentiu, abogan per "no deixar desapareixer l'aragonesismo d'as institucions", ye "un espacio ganau con muito esfuerzo" y "no puede quedar en mans de partius estatals y centralistas que son suchetos a una obediencia debida a las suyas aparatos centrals". Amás, anyaden, "no podemos ixuplidar lo preocupant creiximiento d'a ultraderecha a la quala cal plantar cara y privar que s'instale en as institucions y menos en os gubiernos".
D'o mesmo modo reivindican estar "l'aragonesismo cultural" que "debe servir pa conoixer-nos millor y poder creixer como lugar, desfendendo las nuestras luengas que son un patrimonio de valor incalculable, desenvolvendo prochectos educativos que incluigan las diversidatz aragonesas, exichindo la protección y rehabilitación d'o nuestro descuidado y abandonau patrimonio, que en muitas ocasions lo destruyimos per incultura, per intereses de qualques pocos u lo deixamos funir-se en l'ixuplido que deriva en a suya ruina".
"Somos aragonesistas tamién en lo sindical", continan, y alertan: "Los sindicatos aragoneses han de fer muito esfuerzo pa desenvolver-se, per lo lastre de leis estatals que nomás benefician a los sindicatos mayoritarios d'o Estau espanyol".
Lo sindicalismo l'aragonés "luita pa que los convenios sían d'interpresa, provincials u autonomicos, pero nunca estatals, ya que son mas precarios y no replegan las singularidatz d'o nuestro mercau laboral, los convenios estatals nomás benefician a las grans interpresas y a los sindicatos mayoritarios ya que obtienen beneficios a cambio de negociar penurias pa las personas treballaderas". "Ye necesario un marco aragonés de relacions laborals pa que podamos determinar cómo queremos lo nuestro mercau laboral aragonés", subrayan.
"Somos los aragonesistas que desfendemos lo publico, la sanidat, la educación, uns servicios dignos, los que queremos que se desenvuelta un modelo economico diferent que sía redistributivo y chusto. Somos l'aragonesismo que desfiende la naturaleza, lo paisache y a los paisanos y paisanas, no podemos deixar estricallar lo nuestro territorio natural pa que beluns ganen mas y mas diners, sin importar-les los destrozos meyo ambientals que orichinan astí tenemos l'eixemplo de Canal Rosigue", abundan en o comunicau.
Las once organizacions firmantes d'o manifiesto quieren que "dende lo nuestro aragonesismo se profundice en o nuestro autogobierno, con un financiamiento adequau, adaptada a lo nuestro territorio que nos dote de recursos pa poder desenvolver-nos en igualdat de condicions". "No queremos ni mas, ni menos d'o que nos corresponde, y no podemos ixuplidar-nos que lo Estau espanyol tiene una gran deuda historica con Aragón", sinyalan.
En este sentiu, remarcan que "si queremos aconseguir un Aragón mas fuerte, mas desenvuelto, con mas autogobierno, ye necesario que lo movimiento aragonesista sía fuerte, sobre tot pa desfender-nos d'ixes ataques centralizadors y d'uniformidat social, que matan lo diferent, que eliminan las singularidatz, en a naturaleza la biodiversidat ye necesaria en a sociedat la riqueza radica en a diversidat".
Per zaguer, asperan que este 23 d'abril "sirva pa que l'aragonesismo se faiga mas fuerte". Pa ixo, "debemos treballar en una unión pa fortalecernos frent a tantos y tantos ataques que sufrimos, y ya nomás nos queda decir: Entalto Aragón".
