Tres artes. Tres nombres. Tres mullers. Sirena Talvez, Sara Broto y Elisa Montañés. Aragón sigue estando sinyalau como tierra de talentos y agora plega pa reafirmarlo lo nuevo treballo de Sirena Talvez, la suya segunda propuesta musical: “Gris Lumen”. “Gris Lamento”, lo primer sencillo d'a compositora y cantante de mosica electronica, marcó lo comienzo d'un nuevo capítol en o suyo viache artistico. Con una voz calida, composicions cargadas de simbolismo y una clara visión en a esleción d'os suyos colaboradors, l'artista empecipia a trazar lo suyo camín dentro d'o panorama musical.
Dende l'inicio Sirena Talvez presienta un treballo an la delicadeza ye clau, cuasi una artesanía. “Este treballo ha estau cocinau a fuego lento, sin pausa pero sin prisa, an amomico cada elemento ha iu trobando lo suyo lugar y formando parte d'un concepto y idea común”, describe l'artista. Ye per ixo que trata los suyos temas como tesoros que han de pulirse, baixo un mesmo emblema: la color grisa. Y este ye lo nombre que da a lo suyo EP, que aculle cuatro temas, los cuals ha decidiu acompanyar no d'os habituals videoclips, sino de chicoz films oniricos inspiraus en os oríchens d'o cine.
Ye astí an la tamién aragonesa y artista multidisciplinar, Sara Broto, dentra en escena, como no podeba estar d'unatra traza, con o suyo uello critico y visionario, creyador de movimiento y acción. Entre atros prochectos, l'artista y directora se troba en paralelo creando como integrante d'a colectiva Bosque Anouk y a lo mesmo tiempo como compositora y cantante pa la Universidat d'Oxford y lo Pitt Rivers Museum, chunto a la flautista Cristina Italiani, entre atras colaboradoras.
“La mía inspiración mana mas bien de bella cosa intuitiva, cuan Elena (Sirena Talvez) traye un nuevo tema, me siento a ascuitar-lo con os uellos zarraus y empecipio a veyer una chicota cinta. Astí empecipia tot. Encara asinas nunca deixo de recopilar como autenticos tesoros referencias de cine y fotografía, sobre tot experimentals u con bella mistica.”, comparte Sara. “Somos orgullosas de presentar un prochecto que tiene tanta pasión dezaga. Que Elisa nos haiga regalau la suya danza improvisada, tan preciosista y organica pa Gris Lumen, que ye un tema con tanta fuerza, un viache en o tiempo, y que encaixe sin mas, ixo nomás puede estar alquimia”, anyade la directora d'a pieza.
Elisa Montañés, ye lo talento mas choven d'o prochecto. Con formación en cuantas metodolochías (Arantxa Argüelles, Coppelia, Miibodydance, CMPD) y actualment triada per la beca maxima en Descalzinha (Madrid), la suya danza que baila entre las auguas d'a organicidad, la libertat y la disciplina, ha estau reconoixida en multiples circuitos y premios d'o panorama d'artes escenicas. “Soi muito contenta de poder participar en este prochecto án s'incluyen cuantos campos artisticos como la mosica, la danza, lo treballo audiovisual. Pa yo ha estau una oportunidat muito bonica lo poder colaborar con Elena y Sara y he puesto desfrutar-la muito”, asegura emocionada la bailarina.
Este combo artistico que, profés, no deixará indiferent a lo panorama musical d'o territorio, se materializa lo proximo 11 d'aviento con l'enguero de “Gris Lumen” de Sirena Talvez, en dos formatos: un sencillo y un visualizer que tría la estetica d'o blanco y negro.
