Una d'as midas indispensables pa la supervivencia d'una luenga minorizada ye tener programas do s'emplegue ista luenga en a Televisión publica, unatra ye o suyo reconoiximiento y visibilidat.
En Aragón TV no se cumple ni l'uno ni l'atro. Programas como 'Aragón en Abierto', d'emisión diaria dende totz os costaus d'Aragón, habría d'estar refleixo d'a realidat lingüistica d'Aragón, con sensibilidat y reforzando a consciencia d'os parladors d'aragonés y catalán en Aragón.
Manimenos vidios como iste amuestran a realidat diaria d'a nuestra televisión publica, desconoixendo a existencia d'a variedat "foncense" de l'aragonés, evitando clamar a luenga con suyo nombre "aragonés" u "aragonés foncense" y reforzando a diglosia entre os suyos parladors patrimonials.
