Aprende 50 frases feitas en aragonés pa chicotz y grans con "O nuestro charrar"

Se tracta d'una publicación bilingüe aragonés-castellán y ilustrada, editada per la Comarca Alto Galligo, a traviés d'o convenio que mantiene con la Direccion Cheneral de Politica Lingüistica d'o Gubierno d'Aragón.

Las frases feitas son un tesoro d'o luengache, un legado immaterial que hemos heredau d'os nuestros antepasados. Reflectan la riqueza d'una luenga y la imachinación y ocurrencia d'un lugar, siempre dende el humor y con bell somardeo. Pero son un tesoro, una traza de mirar a lo mundo, a lo mas cercano y a l'universal, que somos perdendo y mas en a sociedat dichital y tecnolochica en a quala nos trobamos immersos actualment.

Ixa perda de memoria, y en parte d'identidat colectiva, ye lo que lo libro ‘O nuestro charrar’ quiere privar. Ye editau per la Comarca d'Alto Galligo, con a colaboración de la Direccion Cheneral de Politica Lingüistica d'o Gubierno d'Aragón, dentro d'o convenio que totas dos institucions mantienen pa promover l'uso de l'aragonés, y replega 50 expresions ilustradas en aragonés pa chicotz y grans, escritas per Iris Orosia Campo y con as ilustracions de Delia Tello. Ye la publicación numero 13 d'a colección Pan de Paxaricos, que edita la Comarca d'Alto Galligo, y forma parte d'o prochecto ‘I+D+I, Formar lectors en a sociedat dichital dende lo libro de no ficción’, financiau per lo Ministerio espanyol de Sciencia, Innovación y Universidatz.

Con un disenyo fresco, actual, muito dinamico y divertiu, lo libro ye bilingüe y busca, como tota la colección Pan de Paxaricos, promover l'uso de l'aragonés en a sociedat actual y difundir-lo, en este caso concreto, recopilando y recuperando frases feitas que s'han iu perdendo con o paso d'os anyos u que han caito en desuso.

L'aragonés, tal como se replega en a publicación, “ye una luenga que nunca deixa de sorprender”. Chaime I ordenó que las leis d'o Reino, los Fueros d'Aragón, estasen replegaus en aragonés y estió la primera luenga romanica a la quala se traducioron en o sieglo XIV los textos de filósofos griegos como Plutarco.

Pero ‘O nuestro charrar’ no ye un libro d'historia de l'aragonés, sino que ofreix historias, feitos y conoixencias de tot tipo en aragonés, aquells que son replegaus u reflectaus en frases feitas como ‘Dimpués de muerto Pascual le daban caldo / A buenas horas mangas verdes’ u ‘Estar mas furo que un totón / Ser más feo que Picio’. En total son 50 frases, divertidas y orichinals, triadas y escritas per Iris Orosia Campo y cada dito ye ilustrau per los dinamicos y expresivos dibuixos de Delia Tello.

Delia Tello ye licenciada en Filolochía y estió profesora entre muitos anyos. Dende chicota le encantaba dibuixar y con a maternidat reprenió esta afición dica tal punto que se tornó en a suya actual profesión, centrando-se en a didactica d’as luengas. La mayor parte d'o suyo treballo ye dedicau a facilitar l'aprendizache d'idiomas u pa reflexionar sobre la importancia d'a luenga como seña d'identidat.

Iris Orosia Campo ye profesora de luenga aragonesa y luenga castellana en a Facultat de Magisterio d'o campus de Uesca. Aficionada a la montanya y a lo piano, le fa goyo buscar parolas amagadas en libros y chents, y un reflecto d'ixo este libro.

‘O nuestro charrar’ ya se puede mercar en librerías de tot Aragón a lo pre de 10 euros. Pero amás ye un prochecto vivo, ya que se busca la implicación d'a sociedat aragonesa aportando la expresión favorita de cadagún y cadaguna, ilustrando-la y penchando-la en Instagram con a etiqueta #onuestrocharrar. U, si no se ye inspirau u no se conoixe garra frase, se puede ilustrar una d'as expresions que nos proposan en a parte final d'a publicación, ‘De punta ta coda / De cabo a rabo’, y que, como la resta de frases feitas que se replegan en o libro, nos quitaran una riseta.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies