O Departamento d’Agricultura, Ganadería y Alimentación d’o Gubierno d’Aragón ha ampliato dica o proximo 9 d’abril o plazo ta solicitar as ayudas destinadas “a la incorporación de chovens agricultors y a la modernización d’explotacions agrarias, en una mesura clau ta impulsar o relevo cheneracional y asegurar o futuro d’o campo aragonés”.
A DChA asegura que “istas ayudas son un d’os prencipals instrumentos ta atrayer nuevos profesionals a o sector y amillorar a competitividat d’as explotacions. Somos fablando d’ferramientas fundamentals ta fixar población, chenerar oportunidatz, sobre tot ta os chovens, y reforzar o medio rural”.
L’ampliación d’o plazo, publicada en o Boletín Oficial d’Aragón (BOA), responde a la coincidencia con atros tramites administrativos, especialment a Solicitud Única d’a PAC, un momento de gran carga burocratica ta agricultors, ganaderas y entidatz asesoras.
A nueva orden no solo amplía o plazo, “sino que introduz milloras ta fer o proceso mas claro y reducir a incertidumbre”. En concreto, se precisan aspectos clau como: a definición d’explotación agraria, tanto en a solicitut como en a fase final, os criterios ta acreditar a condición d’agricultora profesional, incluyendo renda agraria y vida laboral, y os datos fiscals que se prenerán como referencia, evitando dudas por cambios posteriors.
A orden tamién actualiza anexos tecnicos y corriche “imprecisions detectadas en a redacción inicial, facilitando asinas a tramitación d’os expedients”, señalan dende o Gubierno d’Aragón. “O nuestro reto ye que os chovens tiengan claridat sobre os requisitos y puedan acceder a las ayudas con todas as garantias y que o campo siga un sector mas atractivo”, aseguran, y informan que “tota a documentación ya ye disponible en a seu electronica d’o Gubierno d’Aragón”.
