La directora cheneral de Financiamiento y Fondos Europeus d'o Gubierno d'Aragón, Isabel Martín-Retortillo, fació a devantadera este pasau mierques d’o Comité Directivo d'o prochecto POCTEFA Alert-Pyr, que se celebró en Zaragoza, con a participación de responsables de distintas institucions de toz dos costaus d'o Pirineu.
“La capital aragonesa ha estau triada como siede a causa de l'important papel que chuga Aragón en o prochecto. La trobada tiene como obchectivo reforzar lo compromiso d'os socios, informar d'o desembolique y planificar las siguients etapas d'o prochecto, consolidando la cooperación transfronteriza y amillorando la capacidat de respuesta debant de risgos en a subregión d'os Pirineus”, aseveran dende la DChA.
Alert-Pyr ye un prochecto transfronterizo de cooperación que busca abanzar y chestionar los risgos en a zona d'os Pirineus, amillorando la respuesta d'os servicios d'emerchencia a traviés d'a cooperación y l'uso de nuevas ferramientas de chestión operativa.
Lo prochecto treballa en tres arias clau. La chestión operativa: se desenvolverá una cartografía homochenizada d'o territorio y un cuadro de mando pa amillorar la coordinación entre os distintos servicios d'emerchencia transfronterizos. Tamién s'avaluará la viabilidat d'una pasarela pa connectar las diferents frecuencias operativas. Risgos naturals: s'abordarán los risgos naturals d'o territorio, como inundacions, incendios forestals, risgo sísmico y de montanya. Risgos tecnolochicos: lo prochecto busca fortalecer los recursos pa l'anticipación y respuesta a risgos relacionaus con túneles, instalacions industrials y transporte de materials periglosos. Lo Gubierno d'Aragón asegura que las tres arias tendrán “comunicación d'o desembolique y obchectivos d'o prochecto a la sociedat”.
Este prochecto, con una duración de tres anyos y un presupuesto de 4,9 millons d'euros, ye financiau en un 65% per lo Fondo Europeu de Desembolique FEDER. La Direccion Cheneral d'Interior y Emerchencias d'o Departamento de Facienda, Interior y Administración Publica d'o Gubierno d'Aragón “lidera l'acción de risgos naturals, centrando-se en a chestión de risgos sísmicos y de montanya, y en a prevención de lurtes y avalanchas en os Pirineus”, destacan.
Pa abanzar en estas accions, s'han programado diversas actividaz, incluyindo una formación especifica pa lo grupo de rescate de montanya d'os Bomberos de Nafarroa y un exercicio practico de rescate en estructuras colapsadas. Amás, se son desenvolvendo protocolos preventivos pa lo risgo de lurtes en o Pirineu aragonés.
La clausura d'o Comité Directivo ha correspondiu a Miguel Ángel Clavero, director cheneral d'Interior y Emerchencias d'a DChA qui ha incidiu en a necesidat de “seguir treballando con a mesma voluntat de colaboración que ha feito posible esta trobada pa afrontar los desafíos y emerchencias en a zona transfronteriza” d'os países que forman parte d'este prochecto.
A l'evento han asistiu destacadas representants institucionals, amás de Clavero y Martín-Retortillo, lo president de SDIS64, André Arribes, que lidera lo prochecto europeu y a lo cual acompanyaban atras directoras chenerals d'Aragón, Nafarroa, Gipuzkoa, lo vicesíndico d’a Val d'Aran, representants d'os departamentos d'Altos-Pirineus, Alta Garona y Pirineus Atlanticos y tamién d'a Universidat de Zaragoza y d'a de Tarbes. Tamién i habió responsables d'os servicios de bomberos d'Aragón, Francia, Nafarroa, Gipuzkoa y Val d'Aran, asinas como tecnicos de Protección Civil y de l'Instituto Cheografico d'Aragón.
Lo prochecto Alert-Pyr parte d'a primera candidatura de prochectos POCTEFA 2021-2027 y cumple lo suyo primer anyo de funcionamiento. “Lo suyo obchectivo ye dotar de mayor eficacia las intervencions d'os servicios d'emerchencia en os territorios buegants” d'Aragón, los estaus espanyol y francés y Andorra, “per lo que ye necesario la millora d'a cooperación transfronteriza”, concluyen dende lo Gubierno d'Aragón.
