O zaguer 9 d'abril l'alcaldesa d'Ansó y presidenta d'a comarca d'a Chacetania nos sorprendeba con unas declaracions en una entrevista a "elperiodidodearagon". En ella se lamentaba d'a situación d'a variedat de l'aragonés charrada en Ansó tot y que as "institucions invierten un gran esfuerzo pa guaranciar as luengas vernaculas"!!. En ella deciba que "os ninos ya aprenden aragonés ansotano en a escuela, y se empentan obras de teatro y cuentos infantils, u mesmo diccionarios que recopilan expresions y modismos". Remataba dicindo que "se fan muitas cosas, se investiga, pero l'emplego cutiano va a menos".
Dende "Esfendemos as Luengas" queremos fer-le veyer a Montse Castán que:
-Una ripa de expertos en luengas minorizadas coinciden en subrayar que a ensinyanza en as escuelas en aragonés como luenga vehicular ye fundamental y imprescindible pa guaranciar a suya supervivencia. En Aragón no se cumple.
-En o Protocolo de Donostia'16 pa la guarencia d'os dreitos lingüisticos, sinyau por quantas asociacions que treballan con as luengas minorizadas en Europa, nomás i apareixen 4 puntos, d'os 185, que son cumplius en Aragón.
-Que l'unico esfuerzo que han feito as institucions en Aragón en istos zaguers anyos, ha estau a incluisión d'a luenga aragonesa como asignatura "Extraescolar" (voluntaria) de 1 hora a la semana. Dende lo curso 2013-14 en Ansó.
-Actividatz como Teatro, Cuentos y Diccionarios de modismos, muitas vegadas de traza voluntaria, y atras vegadas empentadas por lo programa "Luzía Dueso" no son prou pa revilcar una luenga. Y muitas vegadas no cuentan con recursos prou, como lo caso d'o programa "Luzía Dueso" que estianyo ha deixau 80 centros sin acceso por falta de presupuesto.
-Encara que lo suyo "Diccionario del dialecto Ansotano" ye un gran treballo de replega de modismos u lexico, feito con un gran esfuerzo voluntario. Institutcions como la que vusté preside (Comarca Jacetania) u la que lo suyo partiu PSOE preside en Aragón, habrían de fer un esfuerzo por creyar materials en aragonés.
Porque l'aragonés ya no ye soque una luenga de pastors, ni quatre parolas que fan gracia. Sino que ha d'estar una luenga d'emplego en a carrera, por as institucions y en as nuevas tecnolochías.
Pa rematar, nos preguntamos quála sería a situación d'o castellano si bi'stiera un puesto do, dimpués de sieglos de minorización, nomás se amostrase 1 hora a la semana de traza extraescolar.
