Merçona Puig Antich, chirmana de Salvador Puig Antich, executau en 1974 por o rechimen franquista, declaró en Buenos Aires debant d’a chueza archentina María Servini. Ha estau a primer victima en declarar en l’unico proceso chudicial que s’ha ubierto en tot o mundo por os crimens d’o franquismo. Merçona Puig Antich ye una miembro d’a trentena d’integrants d’a coordinadera d’emparo a la querella archentina -CeAQUA- que ha viachau dica Buenos Aires con motivo d’a querella presentada por delitos de lesa humanidat.
De conchunta con ella, tamién han declarau Pablo Mayoral, procesau en chulio de 1975 en a causa 245/75, en que se pidió pena de muerte a tres companyers suyos, y Andoni Txasko, abatanau por a policía o día siguient d’os asasinaus vitorianos de 1976 y que, de resultas d’os trucos, perdió o uello dreito y a visión d’o cucho. Piden que sían encausaus os exministros franquistas Fernando Suárez González, José Utrera Molina y Rodolfo Martín Villa.
Mientres a resta d’a semana declararán dotze victimas mas d’os crimens d’o franquismo. Amás, s’han programau reunions, como por eixemplo a que ya tenioron a delegación de CeAQUA con a chueza, a qui pidioron que abanzase en a investigación. Servini les manifestó o suyo compromís con a causa, pese a las dificultatz.
O mes de setiembre a chueza emitió una orden de busca y captura de quatro torturadors franquistas: o exguardia civil Jesús Muñecas Aguilar, o exescolta de Francisco Franco y d’a casa reyal espanyola Celso Galván Abascal, o excomisario José Ignacio Giralte González y o exinspector Juan Antonio González Pacheco, alias ‘Billy el Niño’. As causas de Galván Abascal y Giralte González s’archivoron, pero o gubierno espanyol dio o visto bueno a continar o proceso d’extradición de Muñecas Aguilar y González Pacheco. O chueves l’Audiencia espanyola les prenerá declaración ta demandar-les si acceptan estar extraditaus.
Amás, en octubre Servini se declaró competent ta chudgar l’afusilamiento d’o president catalán Lluís Companys, a resultas d’a querella presentada por ERC.
