Hue, 26 d'abril, dende una colla de chen choven d'o lugar han organizau una chornada “pa trobar-nos entre la chen que fablamos y que emos interés por l'aragonés en Chaca. Asobén bi ha chen que sape charrar l'aragonés en Chaca pero no lo charramos porque no emos costumbre de fer-lo servir entre nusatros, por ixo, ta conoixer-nos, perder a vergüenya y charrar emos organizau un ixambre d'actividaz ubiertas”, sinyalan.
“Mesmo si nomás charraz castellán pero tos fa goyo sentir charrar tamién podez venir, ¡de seguras que lo replecaz bien!. Tamién cualisquiera d'a redolada o mesmo de atras partis puede venir si l'agana, ¡prou que sí!”, adhiben.
De maitins puyaran ta Vellanuga ta vesitar a quesería "O Xortical" y “lugo mos posaremos en un merendero a minchar d'alforcha, antimás a las 18.00 oras feremos a presentación y estreno en Chaca d'o documental sobre l'aragonés hue ‘Anvistas/Ambistas’ con la suya directora Iris C. Bandrés O documental tendrá sobtitols en castellán”, explican.
O programa d'o diya ye o siguient: 11.00 oras Plegada y presentación en Acicate, carrera ferrenal, 16 Chaca, 12.00 oras Vesita a la quesería O Xortical -s'organizarán autos ta puyar ta Vellanuga-, “o quesero mos amostrará como fa formache”, 14.00 Chenta d'alforcha, 18.00 Estreno d'Anvistas / Ambistas + Charrada con a directora Iris C. Bandrés –Acicate-, y dimpués “mos feremos un tragué en La Cadiera. Sotz totz convidaus a ista chornada! Todas as actividatz son de baldes”, rematan.
