A Facultat de Filosofía y Letras d’a Universidat de Zaragoza acullirá o venient 2 d’octubre, en a Sala de Grados, a primera trobada d’os Grupos de Acción Campus Iberus GALMAr e ICON, una chornada dedicada a meter en común as actuals linias d’investigación relacionatas con as luengas propias d’Aragón, l’aragonés y lo catalán.
A trobada tiene como obchectivo compartir os treballos que son desenvolvendo-se actualment per las integrants d’os dos grupos, asinas como estudiar y planificar futuras accions conchuntas de transferencia y comunicación científica. A chornada tamién será ubierta a la participación d’atras investigadoras e investigadors interesaus en as luengas d’Aragón, con l’obchectivo de favorecer a conexión con a comunidat universitaria.
Un programa centrato en a investigación arredol d’as luengas d’Aragón
A chornada prencipiará a las 9:00 horas, con a bienvenida a cargo d’o investigador principal (IP) d’o grupo GALMAr. A continación, a las 9:15 horas, Vicente Lagüéns, d’a Universidat de Zaragoza, presentará a ponencia “Desafíos y propuestas para la edición y el estudio lingüístico de la herediana Grant Crónica de Espanya”.
A las 9:45 horas, Guillermo Tomás, de l’Archivo de la Corona d’Aragón (ACA), abordará a “Identificación y edición de fuentes documentales en aragonés medieval”. Dimpués, a las 10:15 horas, Carlos Rizos, d’a Universitat de Lleida (UdL), ufertará a ponencia “Socialització de la toponímia menor a la Ribagorça aragonesa”.
Dimpués d’una pausa-café, prevista a las 10:45 horas, o programa se reprendrá a las 11:15 horas con a intervención de Iraide Ibarretxe, Andrea Ariño, Mª Teresa Moret, Alberto Hijazo e Katia Benaiges, d’a Universidat de Zaragoza y o grupo ICON, que presentarán “Entender el lenguaje desde las lenguas de Aragón: preguntas, datos y métodos del grupo de acción ICON”.
A las 12:30 horas, Javier Giralt, d’a Universidat de Zaragoza, charrará sobre “Toponomasticon hispaniae: Aragón”. Meya hora dimpués, a las 13:00 horas, María Teresa Moret, tamién d’a Universidat de Zaragoza, presentará “El final d’una llengua administrativa: les darreres actes en català de Fraga (1501-1504)”.
Dimpués de minchar, l’actividat se reanudarà a las 16:00 horas con a intervención de Natxo Sorolla, d’a Universidat de Zaragoza, titulada “Mesurant la substitució lingüística a la Franja: demolingüística i xarxes”.
A las 16:30 horas, Chabier Gimeno e Verónica Larraz, d’a Universidat de Zaragoza, abordarán “Chenero y familia: la socialización lingüistica de l’aragonés en Echo”. Finalment, a las 17:00 horas, Juan Pablo Martínez, d’a Universidat de Zaragoza, cerrará o programa con a ponencia “L’aragonés dichital: ferramientas, datos y intelichencia artificial”.
A trobada permitirá asinas abordar, dende diferents perspectivas y metodolochías, qüestions relacionadas con a documentación historica, a lingüistica, a toponimia, a demolingüistica, a socialización lingüistica y as nuevas tecnolochías aplicadas a l’estudio d’as luengas d’Aragón, amás de favorecer l’intercambio entre grupos y prochectos d’investigación.
