L'interés por o futuro d'o lince iberico u gato cerval en Os Monegros contina creixendo. Más de 170 vecins y vecinas plenoron iste pasau sabado o salón d'actos de lo Concello de Lecinyena ta asistir a la prochección d'o documental 'El Retorno del Guardián' , una producción empentada por a Plataforma Monegros por el Lince.
A sesión, celebrada ta las 20:00 horas, se convertió en una d'as más multitudinarias d'o ciclo de procheccions que ye recorrendo diferents municipios y lugars d'a comarca con l'obchectivo d'acercar a la ciudadanía as experiencias de recuperación d'o lince iberico en Aragón, y en o conchunto d'a peninsula iberica, y ubrir un espacio de reflexión arredol d'o suyo posible retorno a ‘Monegros sur’.
Dimpués d'a prochección, as asistentes participoron en un animau coloquio en o qual se plantearon numerosas preguntas arredol d'o proceso de reintroducción d'o lince iberico. Entre l'alcuentro, “qualques vecins manifestoron a suya sorpresa por a escasa información institucional que, seguntes o suyo criterio, ha plegau ta la población sobre iste prochecto”, explican dende a organización.
A Plataforma Monegros por el Lince explicó belunas d'as dudas planteadas y recordó que buena parte d'a documentación y d'os informes relacionaus con a iniciativa pueden consultarse publicament a traviés d'a suya web.
Feito por a productora aragonesa Apache Comunicación, 'El Retorno del Guardián' muestra os testimonios de cientificas, agricultors, ganaderas, cazataires y habitants de zonas an o lince iberico ha estau reintroduciu con exito, mostrando cómo a conservación d'a biodiversidat puede convertise tamién en una oportunidat ta o desenrrollo d'o meyo rural.
“Entre as voces que participan en o documental se troba Miguel Delibes, considerau un d'os mayores expertos mundials en lince iberico, chunto con protagonistas d'enclaves como Doñana u a Sierra d'Andújar, referents en a recuperación d'a especie”, destacan dende a entidat organizadora.
L'elevada participación rechistrada en Lecinyena confirma o creixent interés d'a vecindat d'Os Monegros “por conoixer de primera man a realidat d'o lince iberico y continar formando parte d'un debate ubierto sobre o futuro d'o territorio, en un ciclo de procheccions que contina acercando o documental a diferents localidatz vinculadas con o prochecto”.
A entidat organizadora anuncia que “amás, en os proximos meses o documental viachará ta nuevos puestos d'Os Monegros, como Alcubierre, Sarinyena, Burcharaloz, Castillón de Monegros u Farlet”.
