A Fundación Nueva Cultura de l’Augua (FNCA) ha presentau l’Informe OPPA 2025, una nueva edición d’o treballo elaborau por l’Observatorio de Politicas Publicas de l’Augua (OPPA), coincidindo con o Día Mundial de lo medio ambient, que se celebra cada 5 de chunio. A publicación se consolida como una d’as prencipals referencias ta l’analís critica d’a chestión de l’augua en o Estau espanyol y d’os retos que afrontan os ecosistemas acuaticos en un contexto marcau por o cambio climatico y l’aumento d’a presión sobre os recursos hidricos.
Seguntes explica a FNCA, l’informe ofreix una visión ampla de beluns d’os debates mas relevants relacionaus con a politica de l’augua, combinando analisis tecnicos, propuestas de millora y reflexions estratechicas orientadas a abanzar enta una chestión mas sostenible, socialment chusta y adaptada a os limites ecolochicos.
Un d’os aspectos centrals d’ista edición ye a revisión critica d’os Esquemas Provisionals de Temas Importants correspondients a o cuarto ciclo de planificación hidrolochica. L’analís concluye que os abances lograus entre os tres ciclos anteriors han estau insuficients y advierte d’a necesidat d’introducir cambios substancials en os instrumentos de planificación ta responder adecuadament a os efectos d’o cambio climatico y a as creixients presions que suportan os ecosistemas acuaticos.
L’informe tamién examina as leccions extraitas dimpués d’a DANA que afectó amplas zonas d’o Estau, con especial incidencia en o País Valencià, entre o mes d’octubre de 2024. A partir d’ixe episodio, a publicación aborda a chestión d’o riesgo d’inundacions y plantea reflexions sobre a necesidat d’adaptar as politicas publicas a fenomenos meteorolochicos extremos cada vegada mas freqüents y intensos.
As auguas soterranias constituyen atro d’os eixes d’analís d’o documento. As autoras alertan sobre os problemas de contaminación y sobreexplotación que afectan a numerosos acuifers, una situación que consideran especialment preocupant en un escenario de creixient escasez hidrica. Asinas mesmo, l’informe afunda en os conflictos vinculaus a os trasvases y a chestión d’os regadius, dos qüestions que continan ocupando un puesto central en os debates sobre a distribución y l’uso de l’augua.
Os dreitos humans a l’augua y a o saneamiento
Dende a perspectiva d’a chusticia ambiental, l’Informe OPPA 2025 mete o foco en a necesidat d’impulsar una transición hidrica chusta sustentada en criterios ambientals, socials y territorials. En iste sentiu, a publicación incorpora una reflexión especifica sobre os dreitos humans a l’augua y a o saneamiento, resaltando a importancia de principios como a sostenibilidat, a equidat, a participación publica y a rendición de cuentas en a gobernanza de l’augua.
O treballo tecnico reculle amás diversos estudios de caso relacionaus con conflictos socioambientals. Entre ixes figura un balance d’os vinticinco anyos de movilización d’a Plataforma en Defensa de l’Ebre, una d’as prencipals expresions de resistencia social debant de determinaus prochectos de chestión hidraulica en a cuenca de l’Ebro. Tamién analiza o conflicto chenerau en Galiza por o prochecto de macrocelulosa impulsau por a empresa Altri, una iniciativa que ha suscitau una ampla contestación social y ambiental por os suyos potencials impactos sobre os recursos hidricos y o territorio.
L’informe se completa con as conclusions d’o XIII Congreso Iberico de Chestión y Planificación de l’Augua, celebrau recientment en Salamanca, un encuentro que reunió a especialistas, investigadoras y profesionales ta debatir sobre os desafius presents y futuros d’a chestión hidrica en a peninsula iberica.
A FNCA sinyala que ista publicación reculle resultaus derivaus d’o prochecto d’investigación “A transición hidrica chusta como ferramienta debant d’o cambio climatico: una fuella de rota”, financiau por o Ministerio ta la Transición Ecolochica y o Reto Demografico, encara que precisa que o conteniu de l’informe no expresa necesariament a opinión d’ixe ministerio.
Con ista nueva edición, a Fundación Nueva Cultura de l’Augua reafirma o suyo compromiso con l’analís independient, a divulgación cientifica y a promoción de politicas publicas orientadas a garantizar a protección d’os ecosistemas acuaticos y l’acceso a l’augua ta as cheneracions presents y futuras.
En un contexto definiu por a emerchencia climatica, o deterioro d’os ecosistemas acuaticos y l’encieto d’o cuarto ciclo de planificación hidrolochica, as responsables de l’informe consideran que resulta imprescindible abanzar enta modelos de chestión de l’augua mas sostenibles, democratics y socialment chustos, capables de responder a os desafius ambientals y socials que marcarán as proximas decadas.
RAPA: “O mundo d’ahiere ya no existe”
A Ret d’Augua Publica d’Aragón (RAPA), a traviés d’una reflexion publicada en o suyo espacio de comunicación dichital Marea Azul, ha advertiu d’a necesidat que a futura planificación hidrolochica d’a cuenca de l’Ebro incorpore medidas mas ambiciosas ta afrontar os retos ambientals, climaticos y socials vinculaus con a chestión de l’augua .
A entidat recuerda que o pasau 28 de mayo remató o periodo de presentación d’aportacions a l’Esquema Provisional de Temas Importants (EpTI), una fase previa a la elaboración d’o nuevo Plan Hidrolochico de l’Ebro, cuya tramitación continará con a participación publica d’o borrador dica abril de 2027. L’aprobación definitiva ye prevista ta finals d’ixe mesmo anyo.
En paralelo a iste proceso, a organización destaca a celebración en Tortosa d’a asamblea anual d’a Fundación Nueva Cultura de l’Augua, coincidindo con o 25 aniversario d’a Plataforma en Defensa de l’Ebro, asinas como a recient presentación de l’informe “Retos d’a planificación y chestión de l’augua en lo Estau espanyol. Informe 2025”, elaborau por l’Observatorio d’as Politicas de l’Augua d’a FNCA y coordinau por Julia Martínez y Francesc La Roca.
A RAPA considera que ya no ye posible continar aplazando o cumplimiento d’os obchectivos ambientals fixaus por a normativa europea y reclama que os nuevos plans hidrolochicos afronten de traza decidida os problemas pendients acumulaus entre os ciclos anteriors.
A Ret d’Augua Publica d’Aragón cita como eixemplos a expansión d’os centros de datos en distintas cuencas hidrograficas y advierte que as suyas necesidatz d’augua continan envueltas de manca de transparencia y pueden dentrar en competencia con usos ya consolidaus. Asinas mesmo, sinyala as presions exercidas por determinaus lobbies miners sobre as institucions europeas en o contexto d’a creixent demanda de materias primas estratechicas.
A organización vincula istes debates con una situación global marcada por a crisi ecolochica y por a dificultat d’abordar problemas estructurals de largo recorríu. A o suyo chudicio, a chestión de l’augua constituye un d’os ambitos an más clarament se refleixan istas tensions, especialment en una cuenca tan relevant como a de l’Ebro.
Por ixo, a RAPA defende que a planificación hidrolochica dica 2033 ha d’aliniar-se con os limites planetarios y con as exichencias derivadas d’o cambio climatico. En iste sentiu, considera insuficient incorporar en os documentos oficials referencias a la mitigación d’impactos u a la revisión d’as dotacions de regadío si istas medidas no van acompanyadas de transformacions reals en a chestión y en a toma de decisions.
A entidat concluye que o futuro ordenamiento d’os recursos hidricos habrá de traducir os compromisos ambientals en actuaciones efectivas ta evitar que os obchectivos recullius en os plans acaben convertindo-se en simples declaracions sin aplicación practica.
