O concello de Sant Chuan de Plan, en a Val de Chistau, celebrará d’o 21 a o 24 de mayo as Chornadas de Pastoralismo, un encuentro dedicau a la ganadería extensiva, la cultura pastoril y o futuro d’os territorios de montanya, coincidindo con o 5º aniversario de La Estiva, la Escuela de Pastoreo d’Aragón.
As experiencias y o futuro d’o sector en a Comarca de Sobrarbe serán a tematica central, arredol d’a quala s’han organizau conferencias, mesas de debate, experiencias innovadoras, exposicions, encuentros profesionals y propuestas culturals dirichidas a vecins, profesionals d’o sector, institucions y publico cheneral. As chornadas prencipiarán o chueves 21 de mayo con a charrada “Historias de Sobrarbe y el pastoreo”, a cargo de l’escriptor José Antonio Adell en La Sarra.
O viernes 22 tendrá lugar una d’as citas prencipals d’o programa: a mesa redonda “Ganadería de montaña y pastoralismo: gestión de un territorio vivo”, en a quala participarán representants institucionals y experts vinculados a o desenrollo rural y a cooperación transfronteriza, entre els Francesc Boya Alós, secretario cheneral pa o Reto Demográfico d’o MITECO, Enrique Novales, director cheneral de Calidat y Seguranza Alimentaria d’o Gubierno d’Aragón, tamién será José Cebollero, presidente d’a Comisión de Desarollo, Iniciativas Territorials y Programas Europeus d’a Deputación d’Uesca, y Maryse Beyrié, alcaldesa de Vielle-Aure y vicepresidenta de Turismo y Relacions Transfronterizas d’o Departament Hautes-Pyrénées, ista zaguera como entidat socia d’o Poctefa Dusal+, a o qual tamién perteneixe lo Concello de Sant Chuan y gracias a o qual s’han sufragau as actividatz d’istas chornadas.
O sabado 23 concentrará buena parte d’as actividatz. A chornada prencipiará con a emisión en directo d’o programa “De puertas al campo” d’Aragón Radio dende La Estiva, y continará con un encuentro de totas as promocions d’a Escuela de Pastoreo d’Aragón ta meter en valor os suyos cinco anyos de trayectoria, sostenius con la ayuda d’a DPU y a DChA. A meyo día se celebrará a mesa d’experiencias “Modelos que funcionan: innovación, territorio y futuro del pastoralismo”, an se presentarán iniciativas relacionadas con l’empleo pastoril, o relevo cheneracional, o turismo vinculau a la ganadería y a innovación en o meyo rural. Per la tarde, o debate se centrará en l’impacto d’as politicas europeyas y os acuerdos internacionals sobre a ganadería extensiva con a charrada “Europa, ganadería de montaña y nuestro futuro”, dedicada a lo Mercosur y a PAC.
Seguntes l’alcalde de Sant Chuan de Plan, Roberto Serrano, “istas chornadas son una oportunidat ta charrar d’o pastoralismo en positivo, fixando-nos en as iniciativas que son funcionando, en a nuestra historia y en o futuro que, con l’empenyo d’institucions publicas, escuelas de pastoreo como la d’Aragón y personas que son apostando per formar-se y emprender en o sector, se presenta esperanzador”.
En ixe mesmo sentiu se manifiesta Carlos Ferrer, presidente de l’Asociación Ganadera de Sant Chuan de Plan, como parte organizadora chunto con lo concello, assegurando que “l’asistencia no nomás de representants politicos sino tamién, y especialment, d’os nuestros ganaders y pastors como Alberto Palacín y Vanesa Freixa, asinas como de territorios vecins, nos dará una perspectiva ampla y completa d’o estau d’iste oficio ancestral. Imos a charrar de ta án imos y d’a necesidat, agora mas que nunca, de protecher a ganadería de montanya como sinyal d’identidat y como sosten d’os nuestros lugars”.
A programación d’o sabado se completará con una caldereta popular y o concierto de Don Kumbión y DJ Colis. A la programación suma tamién la “Exposición de la Lana” y atra titulada “Pastorear el Fuego”, ubiertas entre totz os días de l’evento. As chornadas concluirán o domingo 24 con una ruta fotografica en l’entorno d’o C.I. Posets-Maladeta baixo o titol “Pastorear el Fuego”.
L’evento ye organizau per lo Concello de Sant Chuan de Plan, l’Asociación Ganadera de Sant Chuan de Plan y La Estiva, con a colaboración de diversas entidatz y iniciativas vinculadas a o pastoralismo y a o desarollo rural, y se financia en o marco d’o prochecto DUSAL+ (EFA 025), d’o qual lo Concello de L’Aínsa-Sobrarbe ye cap de fila. DUSAL+ cuenta con un presupuesto de 1.999.977,69 euros, cofinanciau a o 65% per la Unión Europea a traviés d’o Programa Interreg VI-A. L’obchetivo ye reforzar a integración economica y social d’a zona fronteriza Aragón-Francia-Andorra, creyando, en iste caso, un destino turistico unico entre Sobrarbe y as vals d’Aure y Louron.
