Lo Concello de L’Aínsa-Sobrarbe mete en marcha un nuevo programa experiencial orientau a la formación y l’emplego en l’ambito d’os treballos forestals, l’albanyilería y la chardinería, con l’obchectivo de millorar la cualificación profesional d’as personas participants y contribuir a la conservación de l’entorno natural y patrimonial d’o municipio.
En total son diez personas as que, en o periodo compreniu entre marzo de 2026 y marzo de 2027, participan d’o programa, que cuenta con una subvención de 304.384,40 euros procedent de l’INAEM y l’aportación d’o concello, d’a quala proceden arredol de 50.000 euros. Son dos os certificaus profesionals que s’imparten en iste caso: actividatz auxiliars en conservación y millora de montes (AGAR0309) y Operacions auxiliars de albanyilería de fabricas y cubiertas (EOCB0208). Amás, s’incorpora un modulo d’o certificau d’Instalación y mantenimiento de chardins y zonas verdes (AGAO0208). Lo programa experiencial suma un total de 1.800 horas.
“Este programa tien como novedat la inclusión d’un certificau de profesionalidat perteneixient a l’aria de treballos forestals. Lo reto ye millorar lo patrimonio verde d’a Villa Medieval, actuando sobre terrenos de abundante vexetación y difícil acceso, cuya proximidat a lo nucleo urbano suposa un potencial riesgo d’incendio. Amás, crearemos nuevas aceras ta peatons en as inmediacions d’o Casco Historico utilizando llosa y bordillo de piedra d’a redolada”, explica la directora y arquitecta tecnica Beatriz Gómez, que asume as funcions de dirección por cuarto anyo.
Por a suya parte, l’alcalde de L’Aínsa-Sobrarbe, Enrique Pueyo, explica que d’as diez personas que se son formando “tres son d’orichen africano, que se trobaban en centros d’acullida de Samianigo y Uesca. Poder integrar-los en iste taller les permite conoixer a atras personas, formar-se y facilitar-les la busqueda d’emplego en o futuro, por o que somos muito contentos d’aduya-los con os recursos que son en a nuestra man”.
Iste ye lo quinto prochecto de formación en alternancia con l’emplego que tien como obchectivo contribuir a la millora de l’atractivo turistico de L’Aínsa. En chinero de 2025 remató lo cuarto programa dimpués d’una inversión que superó os 374.000 euros. D’ellos, arredol de 100.000 estioron aportaus por a propia Casa d’o Lugar. Ixe taller permitiu consolidar las intervencions en o camín de Casa Santiago dica enlazar con l’inicio d’o camín ta la Cruz Cubierta, en o aparcamiento d’o Castiello, pavimentación, recuperación de muros en os frents norte y sur d’a Villa, limpieza de matolls, etc. En edicions pasadas se millororon os accesos a lo portal d’o Callizo y a lo de Terra Glera.
Os programas experiencials prencipiaron la suya andadura en L’Aínsa en l’anyo 2019. Dende alavez, quasi meyo centenar de personas s’han formau, invertindo más de 1.200.000 euros aportaus por l’INAEM y lo Concello de L’Aínsa-Sobrarbe.
“Gracias a lo refirme de l’INAEM y a l’esfuerzo d’o concello continamos embelleciendo y fendo más accesible lo casco viello, y formamos y damos treballo a personas d’o territorio”, concluye l’alcalde Enrique Pueyo, “tot ixo s’alinea con o nuestro proposito d’asentar población y chenerar oportunidatz laborals en o meyo rural, vinculando-lo a lo mesmo tiempo a la prencipal actividat economica d’o lugar: lo turismo”.
