A Casa d’os Titeres d’Abizanda tornará a ubrir as suyas puertas en Semana Santa con una programación especial que se desenvolupará os días 2, 3, 4 y 5 d’abril. Mientres cuatro chornadas consecutivas, iste espacio de referencia ta las artes escenicas dirichidas a publico familiar en o Sobrarbe acullirá diferents propuestas que combinan teatro de titeres, música y narración.
A programación encetará o chueves 2 d’abril con “La niña jaguar”, d’a compañía brasileña Mosaico Cultural, que se representará en dos sesions, a las 12:00 y a las 17:00 horas. A propuesta mete a lo publico en un universo simbolico y narrativo inspirau en a tradición cultural latinoamericana.
O viernes 3 y o sabado 4 d’abril será o turno de “El jardín de la alegría”, a cargo d’os Titiriteros de Binéfar, una d’as compañías mas reconoixidas d’o panorama aragonés d’o teatro de titeres. Ambas funciones tendrán puesto a las 12:00 horas y recuperan una propuesta escenica pensada ta lo disfrute colectivo d’o publico infantil y familiar.
A programación se zarrará o domingo 5 d’abril, tamién a las 12:00 horas, con “A comer..!”, de Patri Coronas y Monopájaroverde, un espectaclo que combina humor, chuego escenico y música en directo.
As dentradas tienen un precio de 10 euros —con acceso gratuito ta menors de dos anyos— e incluyen, amás d’o espectaclo, a visita a lo museo, o encuentro con as artistas y os artistas y chuegos en a era. O museo ubrirá una hora antes d’o inicio de cada función.
Ver esta publicación en Instagram
