Dende la plataforma ciudadana ‘Oroel no se toca’ quieren “agradeixer a toz los vecins y vecinas de Chaca la suya participación en a enquesta que se levó a cabo este pasau domingo”. Tamién quiere “reconoixer a los cinco funcionarios d'o Concello de Chaca lo suyo esfuerzo y lo suyo treballo per haber-la feito posible”.
“Somos muito satisfeitos con o resultau obteniu. La opción de paralizar Oroel Park contó con o 74,2% d'os votos emitius. Esta respuesta viene a contrimostrar que cuan la ciudadanía charra lo fa con coherencia y sentiu común”, aseguran.
Inciden en que “pa l'equipo de gubierno y, en concreto, pa la concejala Lucía Guillén, no estió suficient la decisión mayoritaria d'o pleno municipal d'o día 16 de setiembre ordenando la paralización d'o prochecto, tampoco la moción aprebada en as Corz d'Aragón instando a complir ixe mandato. Ignoró la manifestación de mas de 500 personas en a puerta d’o concello, y ridiculizó los milars de sinyaturas replegadas en contra d'o prochecto Oroel Park, entre estes zaguers días”.
Amás, dende ‘Oroel no se toca’ relatan como “en a exposición de Oroel Park d'o día 1 d'octubre levau a cabo en o Palacio de Congresos, Guillén se veyió obligada a realizar una consulta popular. Finalment, este domingo día 19, lo Concello de Chaca ofrió a los ciudadans una pseudoencuesta con a esperanza que podese salir un resultau que les permitise seguir adebant con o prochecto. Esta enquesta se levó a cabo sin la cobertura normativa d'o Reglamento de Participación Ciudadana aprebau nomás uns meses dinantes. Los vecins y vecinas habioron d'endurar interminables codas a causa d'a improvisación de la consulta y, amás, no se contempló lo voto telematico y muitos ciudadans, que ixe día no se trobaban en Chaca, no podioron exercer lo suyo lechitimo dreito”.
Per tot ixo, dende la plataforma ciudadana explican que “no podemos entender l'interés per parte de Lucia Guillén de levar a cabo lo suyo Oroel Park contra aire y mareya. Las consecuencias que las suyas decisions han provocau a nivel de convivencia ciudadana, lo despilfarro de recursos economicos d'o municipio, y lo tiempo de treballo d'os funcionarios, ha estau lo pre d'o suyo estéril empenyo”.
Per unatra parte, sinyalan que “la moción aprebada en o Pleno d'o día 16 de setiembre, instando a la paralización d'o Prochecto en o Parador, y que l'alcalde de Chaca evitaba ordenar decindo que tot yera en mans d'a Mancomunidat de l'Alta Val de l'Aragón y que él no podeba fer cosa, resulta que, curiosament a lo día de hue, ixa dificultat ha desapareixiu. Asinas lo reflectan las suyas recients declaracions dimpués de la consulta, en as cualas ya planteya un cambio d'ubicación”.
Con tot esto “pareixe estar que hemos plegau a la fin d'este proceso. Lo refuso mayoritario a Oroel Park expresau en ixas urnas creyemos que ha teniu, esta vegada sí, lo suyo efecto”, enfatizan.
D'o park a lo gourmet: cosmopaletismo ilustrau
Dende ‘Oroel no se toca’ asperan “que luego se leve a cabo la rehabilitación de l'edificio-restaurant d'o Parador como siempre l'hemos conoixiu. Manimenos, os rumors que nos plegan de rehabilitarlo como un restaurant gourmet con fins turisticas, nos preocupan. Asperemos que no se caiga en a mesma error y que lo sentiu común s'impose y no se siga abanzando per ixa vía”.
“Creyemos que la opción que los vecins de Chaca trioron mayoritariament lo domingo, estió la que esta clase de desarrollo que nos quieren imposar dende lo Gubierno d'Aragón con o suyo Plan Pirineus no se quiere pa esta zona. Amenestemos unatra clase d'inversions que aseguren seguir vivindo aquí con guarencias y dignidat: frenando lo turismo sin control, con acceso a una vivienda asequible, con servicios sanitarios u educativos, con buenas infrastructuras, etc.”, subrayan dende la plataforma ciudadana.
Finalment, la plataforma ciudadana ‘Oroel no se toca’ torna a reiterar lo suyo agradeiximiento “a los ciudadans que con o suyo voto salvoron lo Parador y la suya redolada. Lo Parador de Oroel seguirá estando intacto en o corazón y en a vida d'os chaqueses y chaquesas”.
