La Fundación Dinópolis ha presentau la localización de nuevos rastros de dinosaurios trobadas en os municipios de Allepuz, Cedrillas y Jorcas “en o marco d'as XL Chornadas d'a Sociedat Espanyola de Paleontolochía, que se celebran d'o 6 a lo 10 d'octubre en Aracena y en as cualas la fundación participa como unas d'as entidaz organizadoras”, sinyalan.
Una d'as contribucions subrayadas per Fundación Dinópolis se centra en l'analisi d'as primeras icnitas (rastros fósiles) de dinosaurios descritas d'o municipio de Jorcas y d'atras procedents de Allepuz y Cedrillas.
Cheolochicament, estas icnitas se localizan en o Cretácico Inferior, en concreto son d'o piso Barremiense, con uns 125 millons d'anyos d'antiguidat. Los rastros, en a suya mayoría fosilizaus como contramoldes u farcius de areniscas, vareyan en grandaria y grau de detalle anatomico (en belunas s'observan las impresions d'a piel d'o dinosaurio productor).
Cualques d'estes rastros aconsiguen dica 50 cm de longaria y presientan caracteristicas que permiten clasificar-las a lo icnogénero Caririchnium, lo cual s'atribuye a grans ornitópodos como, per eixemplo, Iguanodon. Este dinosaurio se caracteriza per minchar plantas, per presentar un pico córneo, carecer de ‘armadura’ y per caminar habitualment de forma cuadrúpeda.
Per unatra parte, respective a los hallazgos sobre atros fósiles de dinosaurios, tamién se presienta preliminarment un nuevo yacimiento de rastros de piez y mans de grans dinosaurios ornitópodos d'Alcalá d'a Selva. D'a mesma edat, uns 125 millons d'anyos, son las nuevas restas osteológicos procedents de Galve y que se corresponden a parte d'o sacro d'un individuo adulto y robusto de Iguanodon galvensis.
Atras contribucions, en colaboración con paleontólogas d'a UNED, tratan sobre la diversidat d'as tortugas de fa uns 110 millons d'anyos d'antiguidat (Albiense, Cretácico Inferior) de Ariño y la identificación de patolochías en a suya caparazón.
Per zaguer, en unatra contribución se documenta lo proceso de reconstrucción escultorica d'o ornitópodo de Riodeva, Oblitosaurus bunnuelli, y que s'exposa actualment en Dinópolis en a ciudat de Teruel.
Estas aportacions d'a Fundación Dinópolis son financiadas per lo Gubierno d'Aragón a traviés d'o Grupo d'Investigación FOCONTUR E04_23R y per lo Ministerio de Ciencia, Innovación y Universidaz d'o Gubierno d'o Estau espanyol a traviés d'a Unidat de Paleontolochía de Teruel, y per lo Prochecto PID2024-162804NB-I00 a traviés d'o MICIU/AEI /10.13039/501100011033/FEDER, d'a Unión Europea.
