Presentacions de libros, stands d'editorials y atraccions infantils componen este anyo la sucosa ofierta d'una feria que reivindica cada anyo lo suyo puesto como notable muestra d'a literatura en Aragón, tanto en castellán como en aragonés.
L'acto prencipiará a las diez d'o maitín y a las 10:45 se celebrará la devantadera oficial. Poco dimpués, a las 11:00 horas, se ferá la primera presentación: “Tronus, la guardia de los sueños”, novela d'o zaragozano Carlos G. Esteban. En esta obra, os limites entre la realidat y los suenyos se desdibuixan, explorando las profundidaz d'o subconsciente humán a traviés d'una narrativa envolvente y cargada de simbolismo.
Seguirá, a las 11:30 horas, la presentación de “Espurnas de cadiera y fogaril”, un libro de relatos, escritos per lo expolítico Bizén Fuster, son historias cutianas d'atras epocas en Ribagorza, Sobrarbe y Somontano.
Tamién en aragonés ye escrito “Fuellas d’Abisinia”, d'o filólogo taustano y president d'o Consello d’a Fabla Aragonesa, Chusé Inazio Nabarro. Ye un libro de viaches que narra la experiencia de l'autor en Abisinia (Etiopía). Se presentará a las 12:00 horas.
Meya hora mas tarde, lo escritor zaragozano José Ignacio Escudero charrará d'a suya primera novela, “Escúpele al pantano”, que aborda la cruel inundación d'o lugar de Mediano, en Sobrarbe, en abril de 1969. Las familias tasament tenioron tiempo de replegar las suyas pertenencias cuan lo pantano afogó lo lugar.
Lo maitín se zarrará con un cuentacuentos, “Jorge / Chorche”, a cargo de Laura Ferrer y Cristina Madrona, y con a comparsa de cabezudos La Antigua Química.
L'actividat literaria se reprendrá a las 17:00 horas con a presentación de “Laderas del tiempo”, una antolochía poetica d'o zaragozano Fran Picón. Meya hora mas tarde, Alida Quilárquez, venezolana afincada en Zaragoza, charrará d'a suya novela “Diente maño”, un commovedor relato ambientado en 1938, entre la guerra civil.
Lo filólogo Antonio Eito y lo sociólogo Alejandro Pardos presentarán a las 18:00 horas “Charrando aragonés, la lengua aragonesa en su zona de uso predominante”. Se trata d'un estudeyo sociolochico sobre l'uso de l'aragonés en os zaguers decenios.
Contino, las escritoras Cris Bernadó y Adela Rubio darán a conoixer lo libro “Palabra de reina y otras voces dictadas al viento”. Se trata d'una colección de relatos medievals dende una perspectiva femenina.
Lo historiador Antonio Peiró charrará, a las 19:00 horas, de “Joaquín Ascaso: el anarquista que presidió un gobierno”. L'ensayo s'amana a la figura d'o cual estase president d'o Consello d'Aragón, gubierno autonomo y independient que chestionó entre uns meses practicament la metat d'o país, la metat d'Aragón que encara no heba caito en as garras d'o faixismo.
La clausura d'a feria se ferá a las 20:30 horas. “En o caso que fese mal tiempo, se tresladaría a lo centro civico, con a mesma calendata y lo mesmo horario”, concluyen dende l'AC Rebellar.
