La segunda propuesta d'os Conciertos del Agua 2025 “plega con un d'os grupos mas emblematicos y quiestos d'Aragón, La Ronda de Boltaña”, destacan dende lo Concello de Exeya.
Con mas de 30 anyos de trayectoria, esta colla d'amigos que empecipió fendo ronda y puyoron a los escenarios pa atender la demanda y la querencia d'o publico, interpretan tanto piezas tradicionals como de nueva creyación componidas per lo grupo, con as cualas desfienden la tierra, a las chents y la cultura d'o nuestro país en o suyo conchunto y explican la traza de vivir d'o Pirineu pa compartir-la con tot Aragón. La cita ye lo sabado 26 de chulio en l'Anfiteatro d'a Ciudat de l'Augua d'a capital d'as Cinco Villas, a las 22:30 d'a nueit.
“I hai un respecto, una querencia y una admiración tan grans per La Ronda de Boltaña, que dende que s'anunció la suya participación en os ‘Conciertos del Agua’, s'ha chenerau una corrient d'expectación entre la ciudadanía que emociona. No en balde ye un d'os grupos mas emblematicos y quiestos d'Aragón, a qui lo publico sigue ascuitando dende fa tres decenios con respecto y emoción perque aúnan una visión d'a mosica en a cuala confluyen consciencia social, identidat aragonesa y compromiso cultural”, recalcan dende lo Concello de Exeya.
Dende lo concello d'a capital comarcal asegura que “encara que vivimos en un mundo en o cual triunfa la cultura de lo efímero y la fugacidad d'as modas campa a las suyas amplas, resulta esperanzador que i haiga artistas y que i haiga publicos que siguen emocionando-se cuan se charra d'a vida rural, de l'abandono d'os lugars, d'as tradicions. Astí cobra sentiu La Ronda de Boltaña, tanto cuan tocan en as carreras como cuan lo fan sobre un escenario, chenerando una corrient de felicidat y entusiasmo en a chent que los ascuita y que corea con éls temas que son verdaderas banderas d'a cultura aragonesa”.
Dende lo suyo zaguer disco “La estación de las violetas” a atros memorables como “Banderas de humo”, “Bailando entre ruinas”, “La huella que el tiempo deja”, “Salud, país!”, entre atros, la discografía de La Ronda de Boltaña “ye lo testimonio d'o treballo d'este grupo d'amigos, que son como una familia, que cantan y contan historias, que nos recuerdan que lo folklore ye vivo, que aman y fan amar a Aragón y que, en esta edición d'os Conciertos del Agua 2025, nos han atorgau lo privilechio de fer un hueco en a suya achenda infinita pa baixar dica Exeya dende lo Sobrarbe y fer-nos felices con a suya mosica y la suya bonhomía. Y lo fan, cal recordar-lo pa qui no lo saba, con chenerosidat, perque forma parte d'a suya filosofía artistica no mediar cachet en as suyas actuacions, bella cosa que diz muito d'o suyo modo d'entender la mosica y la vida”, enfatizan dende lo Concello.
“L'Anfiteatro d'a Ciudat de l'Augua de Exeya aspera a esta formación en a cuala guitarra, guitarro, laúd, bandurria, gaita de boto, trompa, chuflo, salterio u chicotén, clarinete, baixo, contrabajo, acordeón se aunarán con as voces d'estes músicos pa desfrutar d'una experiencia cultural extraordinaria”, concluyen.
