La Deputación de Zaragoza acullirá este martes, 27 de mayo, a las 19:00 horas, la presentación d'o estudeyo sociolingüistico “Charrando aragonés. La luenga aragonesa en a suya zona d'uso predominant”, una obra colectiva que analisa en profundidat la situación actual de l'idioma aragonés en as arias an encara se charra habitualment. L'acto s'enmarca dentro d'o ciclo “Presentacions con encanto” d'a DPZ y se ferá en l'antigo salón de plenos, acceso per la carrera Cinco de Marzo, 8 d'a capital d'o país, con dentrada libre dica completar l’aforo.
Os autors, Antonio Eito Mateo, José Ángel Iranzo Sanz, Chaime Marcuello Servós y Alejandro Pardos Calvo, serán acompanyaus per José Domingo Dueñas Lorente, director d'a Cátedra Johan Ferrández d'Heredia d'a Universidat de Zaragoza, y lo deputau delegau de Archivos y Bibliotecas d'a DPZ, José Manuel Latorre.
Latorre destaca que “a partir de datos empiricos obtenius per medio d'1.000 enquestas, los autors examinan los usos lingüisticos en distintos contextos socials —como lo fogar, lo treballo, la educación u l'administración— y desvelan patrones de transmisión, conoixencia y uso d'a luenga seguntes variables como la edat, lo sexo u la grandaria d'o municipio”.
“Lo estudeyo, refirmau per la Cátedra Johan Ferrández d’Heredia, financiau en o suyo momento per la Direccion Cheneral de Politica Lingüistica d'o Gubierno d'Aragón y publicau per Prensas d'a Universidat de Zaragoza, ofreix una fotografía actualizada d'a vitalidat sociolingüistica de l'aragonés, lo que suposa una ferramienta fundamental pa la suya preservación”, anyade lo deputau delegau de Archivos y Bibliotecas.
Os autors: Antonio Eito Mateo (Uesca, 1973), profesor de Treballo Social en a Universidat de Zaragoza. Investigador d'o Grupo de Estudios Socials y d'o Tercer Sector. José Ángel Iranzo Sanz (Zaragoza, 1986), profesor d'Estatistica y Investigación Operativa en a Universidat de Zaragoza. Investigador d'o grupo Analisi Numerica, Optimización y Aplicacions. Chaime Marcuello Servós (Samianigo, 1965), docent en l'aria de Treballo Social y Servicios Socials d'a Universidat de Zaragoza. Alejandro Pardos Calvo (Zaragoza, 1998), graduado en Luengas Modernas. Diploma d'Especialización en Filolochía Aragonesa. Doctorando en Sociolochía d'as Politicas Publicas y Socials.
