ARREDOL | O debat prencipió con as intervencions de PP, PSOE, CiU, IU, ICV, CHA y UPyD. Aragón tasament i tenió presencia.
A presencia d’Aragón iste miercols en a primer sesión d’o debat de politica cheneral en o Congreso d’os diputaus d’Espanya estió bien radida. Dengún d’os dos principals partius espanyols fació garra referencia t’Aragón y calió asperar dica la intervención de Chesús Yuste ta sentir nombrar-lo por primer vegada.
O debat prencipió con a intervención de Mariano Rajoy, president d’Espanya, qui esfendió as midas politicas que ha preso lo suyo gubierno mientres os meses que levan exercendo. Negó que a corrupción estase cheneralizada y sacó fierro d’o problema. Anunció de vez, bellas midas economicas y laborals que se prenerán en os venients diyas, como a flexibilización ta que as interpresas puedan achusar chovens con achustes parcials, temporals y en practicas u una lechislación ta que os autonomos paguen l’IVA d’as facturas nomás quan las cobren y atras midas ta favoreixer que os aturaus se faigan autonomos. En referencia a Catalunya, dició que tot se podeba charrar pero “nomás aintro d’a Constitución” y citó l’articlo a on que diz que a convocatoria de consultas por vía de referéndum ye competencia exclusiva de l’Esatu.
Rubalcaba, portavoz d’o PSOE, se centró más en charrar de bells problemas como a Educación, a Sanidat u l’ature. Carranyó a Rajoy por haber “crebau os equilibrios existents” y reconoixió a suya error en no haber modificau a lei hipotecaria mientres l’anterior lechislatura, quan gubernaba o PSOE de Zapatero. Sobre Catalunya, le acusó de inmovilismo y dició que “o conflicto no se resolverá si no ubrimos a Constitución”. Como ya fació fa bellas semanas, demandó a dimisión de Rajoy como president d’o gubierno.
Cayo Lara, de IU centró o suyo discurso en criticar a lechitimidat de Rajoy en no haber cumpliu o programa con que se presentó en as eleccions que levoron a o PP t’o gubierno espanyol. Tamién dió buen ferrete arredol d’a corrupción y d’o caso Bárcenas de posible financiación ilegal d’o partiu gubernant. Igual como Rubalcaba demandó a dimisión d’o president d’Espanya.
A intervención de Chesús Yuste, diputau de CHA por a Cucha Plural, sí que nombró a Aragón y a beluns d’os problemas d’o país. Mientres os minutos d’a suya intervención, charró de bellas quantas infraestructuras como carreteras y ferrocarrils, d’a minería, d’o fracking y d’una “recentralización” de l’estau “sin precedents”. Tamién demandó a dimisión de Rajoy y a convocatoria de nuevas eleccions estatals. En a suya respuesta Rajoy acusó a Yuste de “no representar a totz os aragoneses” y dició que Luisa Fernanda Rudi, qui bi yera present como convidada, “guaranciaba os intreses d’Aragón”. Tamién acusó a o diputau de CHA y a las organizacions d’a Cucha Plural, d’estar os organizadors d’as mareas y as manifestacions contra las politicas d’o suyo gubierno.
Atros afers rusients en a politica aragonesa, como a politica hidrolochica, a reforma d’a lei de luengas, as polemicas por os escandalos de SARGA y muitos atros quedoron sin apareixer en o debat.
A resta de collas que charroron iste miercols estioron CiU, ICV y UPyD. O chueves ye o turno de PNV y a Colla Parlamentaria mixta.
