A zaguera proposa de reforma educativa d'o Ministro espanyol d'Educación, Wert, quier fer una clucadeta a os sectors mas furos d'a dreita espanyola; mas privatización, mas relichión (catolica, prou que si), y mas centralismo.
Pareix que l'anterior proposa se quedó curta ta seguntes que miembros d'o PP, y ye que agora o nacionalismo espanyol "preba d'acotolar" o creixent independentismo vasco y catalán querendo levar as suyas luengas nacionals difuera de l'amostranza publica.
Dimpués d'a enrestida contra l'amostranza publica, contra l'educación de gufanya ta todas y totz, debant d'o desmantelamiento d'os servicios socials alazetals, agora l'obchetivo d'os ultraconservadors y espanyolistas d'o PP ye aprofitar a crisi ta prebar de centralizar y espanyolizar encara mas a os diferents pueblos que conforman l'Estau espanyol.
En Aragón, aon o gubierno d'a dreita espanyola (PP-PAR) ya anunció a suya proposa de retalle y reforma d'a insuficient Lei de Luengas aprobada por PSOE-CHA en 2009 (ixa lei que ni da la oficialidat, ye voluntaria t'os Concellos y ye discrecional de tot) ista nueva enrestida ye mortal t'as luenguas minorizadas d'Aragón, l'aragonés y o catalán, as dos luengas que durante istas mas de 30 anyadas de "democracia" no han estau reconoixidas a suya oficialidat ni garra mena de reconoiximiento por as institucions, y encara hue continan refusadas por a clase politica aragonesa, estando condenandas d'ista traza t'a desaparixion y a la perdida d'iste gran patrimonio cultural.
Si t'as luengas cooficials ye un trango tazaga, t'a nuestra chicorrona luenga ye dreitament una punyalada en a espalda.
Con tot y con ixo, no imos a reblar en ista luita que venimos esfendiendo dende fa anyadas por a oficialidat de l'aragonés y o catalán ta que puedan formar parti d'una vegada de l'amostranza publica d'os chovens aragoneses y aragonesas.
Aceptar istas midas lingüicidas u no fer cosa por o nuestro patrimonio lingüistico ye refirmar a suya desaparixión, y empentar a imposición d'a luenga castellana.
Aturemos o chenocidio lingüistico!
Universidat, estudiants independentistas y revolucionarias d'Aragón| Para AraInfo
