En as zagueras semanas hemos observau en a ciudat de Uesca una creixent actividat de collas neofaixistas organizadas que con l’emparo de partius politicos estatals han prencipiau a actuar en as nuestras carreras y vicos. De feito se tracta de un chicorron ligallo de nuevos afiliaus a o partiu d’extrema dreita España2000 que tien a casa suya en Valencia capital y que ye conoixiu por a suya afinidat con collas neonazis asinas como con o mundo d’a prostitución y a seguridat privada. Iste partiu prene como referencia a o neonazi griego Amanecer Dorado que aconsiguió representación parlamentaria en as zagueras eleccions y que se caracteriza por a suya xenofobia y os suyos metodos violentos contra inmigrants, mendigos, homosexuals y antifaixistas.
O pasau diya 19 se creyaba ista colla “de treballo” t’a propaganda y a intimidación faixista en a ciudat de Uesca levando a cabo en a venient semana labors de espardidura y de proselitismo. Fuellas, pegallos u pintadas han estau belunas d’as suyas primeras accions en revindicacions como a de “Josué Libertad” que demanda a liberación de l’asesin d’o choven antifaixista Carlos Palomino. Istas pintadas yeran, como no podeba estar d’atra traza, sinyadas con cruces celticas que ye a simbolochía que a ormino fan servir os ligallos neofaixistas europeus. Pero o suyo treballo no s’ha quedau astí, dende a suya recient creyación han levau a cabo tamién una campanya de menazas y d’intimidación por internet publicando por retes socials fotografías con nombres y apellius de militants de Purna-Uesca.
O capitalismo ha feito servir historicament a o faixismo como un arma ta dividir y controlar a la clase treballadera; nomas asinas podemos replecar iste fenomeno social que ye el faixismo, fruito d’o irracionalismo ultranacionalista y a medrana a unatro externo u interno que suposadament menaza a integridat nacional. A patria sustituye a la clase social alienando o esmo de totz os treballadors y treballaderas que cayen en as retes discursivas d’o faixismo y trafucan asinas a orientación d’an se troban reyalment os enemigos a barallar. En tiempos de crisi son en as que con más efectividat alienta o sistema a o faixismo ta privar que o descontento social produciu por as suyas contradiccions pueda rematar esboldregandolo. En ixe contexto nos trobamos y ye por ello que ye agora quan o neofaixismo escomencipia a surtir, encara licherament, por as nuestras carreras, vicos y lugars.
No se nos eslampa que quan se creyó l’anyada pasada l’asambleya de Purna-Teruel ya bi habio menazas d’a extrema dreita; y chustament agora, una semana dimpués de presentar l’Asambleya de Purna-Uesca, s’enzuriza o neofaixismo y se carga, menaza y preba d’intimidar a os nuestros militants. A existencia d’una chovenalla independentista y revolucionaria fa mal y enrebla muito a o sistema capitalista y a os amos patronals; o nuestro creiximiento ye correlativo a la suya medrana y ixo se puet observar en a reacción progresiva que preban d’articular.
De cualsiquier traza en un tiempo de movilización social como agora ye menester que as organizacions y colectivos antifaixistas compleguemos en un mesmo frent practico que truque con unidat a os cans rabiosos d’a reacción. No deixaremos que as suyas menazas nos enreblen, ni que caminen u espardan o suyo mensache d’odio por as nuestras carreras. Ye l’hora d’a compleganza y a unidat antifaixista.
Hue más que no nunca, No Pasarán!!! Aragon Antifaixista!!!
Uesca, 5 de noviembre de 2012, Purna, a chovenalla independentista y revolucionaria
