Dende Purna, a chovenalla revolucionaria y independentista, refirmamos a Vada Cheneral d’o diya 14 y treballamos activament ta que siga un trango entadebant en a esfensa d’os nuestros dreitos por os que muita sangre treballadera s’ha espardiu t’aconseguir-ie.
A Vada Cheneral, aina clasista de protesta colectiva, ye a ferramienta más important que a clase treballadera tien en as suyas mans, no nomas ta esfender as suyas conquistas frent a patronal y gubiernos titeres, sino tamién ta plegar a dreitos alazetals. Os nuestros dreitos alazetals s’han aconseguiu en base a Vadas Chenerals que durante o sieglo XIX y XX han amostrau a fuerza que puet tener a clase obrera organizada quan s’enfrontina a os explotadors.
L’actual situación social, politica y economica d’Aragón y en a resta de l’Estau, con un proceso de deslocalización y tercermundización progresivo nos sitúa en una situación embolicada, an os paganos de l’orden capitalista mundial, somos o pueblo treballador. Debant d’isto, preban solucionar o que claman crisi, que no ye sino un ciclo lochico d’o sistema capitalista, mediante enrestidas a la clase treballadera: retalles en dreitos socials, despidos, ERE´s, privatizacions, endurecimientos d’as leis represoras, puyada de gasto policíal, asinas asinas… tot ello acotrolau con o no cuestionamiento d’un sistema politico antidemocratico, hereu d’o franquismo, y que ye l’alazet ta empentar a especulación economica y a esferra social.
A choventut, chunto a l’emigración y as mullers, como sectors d’a clase obrera más afectaus por ixa “crisi” que ellos han chenerau y que preban de que bosemos nusatras, nos movemos como zombis entre contratos vasuera y precarios (con suerte), acuciaus por un indice d’ature chovenil sin precedents en Aragón, con una puyada insultante d’as tasas universitarias, amanaus a l’emigración forzosa ta pervivir y aduyar a as nuestras familias hipotecadas y deshauciadas.
A chovenalla independentista aragonesa achuga por concarar-se dreitament contra iste orden economico explotador, especulativo y perverso. Ta ello luitamos por ista Vada Cheneral como meyo ta fortalecer o esmo de clase y marchar enta la necesaria unidat revolucionaria d’a clase obrera. A compleganza de fuerzas ta teixer espacios asambleyarios de poder popular en vicos y centros d’estudeo y treballo ye l’unico camin ta deslechitimar y acotolar a dominación d’os parasitos que viven dencima d’as y os treballadors, os unicos que cheneramos a riqueza en ista sociedat.
A choventut aragonesa de clase obrera no aceptamos a imposición de l’achenda neoliberal dictada por a UE-FMI-BM. Achugamos por a organización clasista y por a unidat revolucionaria. No aceptamos medias tintas, ni politicas reformistas que nos condenen a atros 30 anyos de desmovilización, pasividat y perdida d’esmo de clase. O nuestro obchetivo ye achuntar fuerzas, a unidat y o empoderamiento d’a clase obrera.
Ista Vada, primer trango enta la unidat, nomas será factible si sirve ta enantar enta un nuevo orden economico y politico. Un futuro mundo millor, nomas se puet construyir sobre alazets socialistas. IVA, Sanidat, Educación, Ature, Especulación…Ya ye prou, ye menester organizar-se ta luitar por un orden economico chusto. Por o socialismo!
O diya 14-N toda a choventut treballadera aragonesa t’a Vada Cheneral en esfensa d’os suyos dreitos. Frent a o capital y os suyos cans, Unidat Obrera y Popular!!!Entalto a Vada Cheneral!
En Aragón a 7 de noviembre de 2012
Purna, a chovenalla independentista y revolucionaria
