As diferents iniciativas que se son replegando en zagueras dende o mundo d’esfensa d’as luengas minoritarias d’Aragón nos fan venir a plego, a una organización politica como Puyalón, y reflexionar sobre as trazas de continar con una trachectoria, unas vegadas más intensa que atras, pero larga y siempre por a mesma endrecera.
Que s’haiga vulcau una lei de luengas, como la que PSOE-CHA heban aprebau en a zaguer lechislatura d’as Cortz, no ha d’estar sinyal ta que ixa lei hese d’estar la tant demandada normativa que ise a salvar u protecher as luengas minoritarias en Aragón, nian que o Consello d’Europa se’n faiga.
Pa Puyalón de Cuchas a oficilidat ye condición “sine qua non” ta que una lei siga considerada minimament acceptable y refirmada. Una oficialidat, que en o caso d’a luenga aragonesa no se podría reducir a hipoteticas zonas tendenciosament marcadas, porque, tal y como en Navarra u Bretanya ya se ha contrimostrau, siempre redunda en perchuicio d’os ninos y ninas que no habitan ixas hipoteticas zonas.
Un dreito que ya ha estau conseguiu por a mayoría d’as comunidatz que arroclan Espanya, y que no entendemos por qué se le contina negando a Aragón en o respective a la luenga catalana y aragonesa.
Manimenos si ista ye uno d’os alazetz de qualsiquier luenga minoritaria, l’amostranza en ye atro. A negación de l’amostranza en catalán d’as escuelas d’a francha oriental d’Aragón y a febleza con a que se contina treballando ta rader bellas horas extraescolars en as zonas aragonesofablants, son atra muestra d’a negación de dreitos, y unatra demanda in-negociable pa Puyalón
O Consello d’Europa, que ya carranyó en mayo a o gubierno PP-PAR por cambiar a denominación d’as luengas d’Aragón, plega de dicir que Aragón ye incumplindo totz os tractaus y a Carta Europeya d’as Luengas Minoritarias.
L’1 d’Octobre se presentaba en a feria de Fraga “Cinga Fórum 2012” o manifiesto d’Aragón Trilingüe por parti d’a “Coordinadera Aragón Trilingüe” d’a que Puyalón i fa parti. O texto heba estau consensuau y presentau en os diyas precedents por representants d’as asociacions más sinyaleras d’o mundo cultural lingüistico aragonés. Un concierto en a semana d’os pilars continaría con a lista d’actividatz. Nomás un minimo consenso sería prou pa continar con istas iniciativas, un consenso que no podemos fer retacular anyos ta zaga. Ni en as nuestras propias organizacions y en os debates previos a qualsiquier “Coordinadera” que se prenga.
Dende Puyalón asperamos que a nuestra iniciativa, y a d’a resta d’asociacions, faiga revilcar d’una traza definitiva ista actividat en pro d’a luengas minoritarias d’Aragón, l’aragonés y o catalán.
[catalá] | [castellano]
Puyalón de Cuchas
