O 22 de chunyo a concellera d'o PP en Zaragoza, María Navarro, interveniba en o pleno d'a Casa d'a Ciudat pa "lamentar que a capital destinase 25.000 euros d'os presupuestos en creyar una oficina municipal pa difundir a luenga aragonesa, quan seguntes o PP i hai atras prioridatz".
No hemos teniu que ir guaire luen pa trobar uno d'ixos acayecimientos en os que a RAE (Academia de l'Espanyol) se puede gastar tot lo presupuesto d'ista nueva oficina de l'aragonés en bellas horas. Aproveitando a recient aparición d'os estatutos de la nueva Academia Aragonesa de la Lengua tamién por as envueltas de chunyo reviscolamos a campanya d'a RAE "Publicidat en Espanyol".
En iste caso a Reyal Academia d'a Luenga Espanyola celebraba una chornada de debate sobre "¿Se habla español en la publicidad?" en o suyo luixoso salón d'actos. A chornada estió presentada por o president d'a RAE (Darío Villanueva), seguida por o president de l'Academia d'a Publicidat (Fernando Herrero) y rematada por Carlos Baldao, ex-subdirector cheneral de Banco Popular. Banco que dica fa poco se dedicaba a subvencionar campanyas d'ista mena, antis que no se declarase "inviable" y amanau a la quiebra; vendiu a o Santander por un 1 Euro, obligau por os cusiradors d'a Comisión Europea. Más de 300.000 accionistas perdioron la suya inversión.
En as chornadas a RAE exposó as necesidatz de "protecher" y "salvaguardar" o Espanyol d'as luengas foranas, más que más l'anglés, con os recursos que fuesen menister. Pa ello iban a contar con l'aduya laboral de l'Academia d'a Publicidat y economica d'o Banco Popular.
Como siempre en istos casos lamentamos o "doble rasero" d'os partius politicos que se niegan a "preservar" o patrimonio lingüistico aragonés, pero que veyen con buenos uellos os recursos destinaus a la mesma fin con o Castellano.
