Estadio d’espanto, exercicio d’amedrentamiento, escalada de tensión, alarma social… Ye a conclusión a la que plegan intelectuals, advogaus y ciudadanos vinculaus a o 15-M respective a la intención d’o Gubierno de reformar o Codigo Penal.
Os ministerios d’Interior y Chusticia pretenden castigar con a lo menos dos anyos de garchola a qui convoque a traviés d’internet una protesta que altere graument l’orden publico u en a que s’ataquen a las fuerzas de seguridat de l’Estau.
Mesmo sería considerau como un delicto d’atentau a l’autoridat a resistencia pasiva, como deixó ahiere claro o ministro d’Interior, Jorge Fernández Díaz, o que ha provocau una enerchica respuesta por parte d’os movimientos socials.
Rocha: “Ye una mida represiva, porque no existe una alarma social”
“Se lechisla a truco de titular”, protesta l’advogau y ensayista Servando Rocha, que ha levau o caso de dos detenius dimpués d’a manifestación que desembocó en a naixencia d’o 15-M. “A reforma, dende una anvista churidica, ye una barrenada, ya que i hai una delgada linia roya entre a desobediencia, a resistencia y o delicto d’atentau a l’autoridat”, explica o responsable d’a editorial La Felguera.
“Ye muit sencillo que t’imputen o delicto d’atentau. No puede estar que por rechirar-te debant d’uns achents t’exposes a penas de garchola”, afirma Rocha, conscient en tot caso d’a dificultat de plasmar sobre o papel l’endurecimiento d’a lei. “Ye una mida represiva. Amás, se lechisla antis que no se produzca o delicto, porque no existe una alarma social. Se tracta d’usar reformas lechislativas profundas realizadas a la lichera ta transmitir miedo y controlar a os colectivos socials”, adhibe l’advogau, sorprendiu debant d’a intención d’o Gubierno de considerar como delicto a resistencia pasiva. “Charramos d’o tipico cuerpo muerto en una posada pacifica. Astí no i hai animo por parte d’o manifestant d’evitar una detención u d’agredir a os policías”.
Raimundo Viejo: “Os ciudadanos tienen cada vegada mas poder y a l’Estau nomás le queda a escalada de tensión”
Pero, en o caso que se producisen incidents en una manifestación, quál sería a responsabilidat d’o convocant? “A Delegación de Gubierno te pide servicios d’orden, pero astí remata la tuya responsabilidat. Tu no puetz fer o treballo d’a Policía”, aclara Rocha, qui advierte d’o periglo de que se plegue a “un *estadio de miedo en o que dengún no va a querer convocar cosa”. Seguntes ell, ya i ha habiu casos de protestas que no han prosperau “por temor a una sanción administrativa”, pero en iste caso “charraríanos d’un delicto penal grau, o que ye una barrenada”.
L’endurecimiento d’o Codigo Penal y o 15-M
Ye intimament relacionada a hipotetica reforma con a surtida d’o 15-M? Carlos Taibo, profesor de Sciencia Politica en a Universidat Autonoma de Madrit, creye que os gubernants temen o movimiento. “O suyo peso ye notablement mayor que qualsiquier atro ocurriu en o pasau y ixo, con certeza, les ne fa”, apunta. “Caminan desasperaus por a concepción no violenta d’o 15-M y han de recurrir a ista mena de decisions, que producen estupor y eslampan a toda mena d’alazet racional”.
Carlos Taibo: “L’anuncio podría estar un globo sonda ta amedrentar a la chent y evitar as asambleas”
Taibo creye, como atros intelectuals consultaus, que o Gubierno tendrá problemas ta aplicar as midas anunciadas, encara que seguntes ells a intención que subyace sería atra. “Podría estar una estratechia de globo sonda dirichida a preocupar a la ciudadanía -encara que dimpués no pueda fer-se- con un efecto indirecto: que a chent, por eixemplo, no vaiga a las asambleas d’o 15-M”, adhibe l’autor d’o libro “Nada será como antes” (Catarata). “Un exercicio d’amedrentamiento contra la chent común, no nomás contra os activistas”.
Raimundo Viejo coincide en l’analís. “Legalment, a reforma no se va a sostener, por o que no cal cayer en l’alarmismo que [os gubernantes] son indo tan luen. Lo grau no ye tanto en a lei como en que pueda favoreixer a scisión d’a chent que se moviliza enta grupos violentos. U bien a desafección y o socavamiento d’as bases democraticas, que podría traducir-se en l’aparición de movimientos d’extrema dreita”, creye o profesor de Teoría Politica d’a Universitat Pompeu Fabra de Barcelona.
“A chent tien cada vegada mas poder y a l’Estau nomás le queda a escalada de tensión: recurrindo a las politicas d’emerchencia y difuminando os contornos de l’estau de dreito, ta que asinas a interpretación y a chestión d’o control social recaiga sobre a Policía”, insiste Viejo. “No intresa negociar con o movimiento, intresa estricallar-lo”.
Si bien considera que “gran parte d’a ciudadanalla continará movilizando-se, porque a chestión d’a crisi economica ye tan nefasta que va a haber mil motivos ta manifestar-se”, bellas asambleas d’o 15-M tachan l’endurecimiento d’o Codigo Penal de “atentau contra os nuestros dreitos”. Cristina Marchán, miembro d’o movimiento en Compostela, creye que si sale adebant serán “practicament indefensos” y no podrán “reivindicar absolutament cosa”.
“A reforma ye propia de países tan evolucionaus en materia de dreitos socials como China. Suposa un retroceso tremendo que nos deixa en os tiempos d’o franquismo. No podemos deixar que isto se faiga realidat”, se queixa Marchán, qui observa una “relación prou directa” entre a “resistencia pacifica y pasiva d’o 15-M” y a inclusión d’ista como delicto d’atentau a l’autoridat en o Codigo Penal.
Criminalización d’os movimientos socials
A reforma tamién consideraría delicto de pertenencia a organización criminal a convocatoria a traviés de qualsiquier meyo d’actos que alteren l’orden publico, bi incluyiu o ret, bella cosa “dolenta y premeditada” seguntes o pareixer de l’activista gallega. “Con a criminalización de convocatorias por internet te meten a l’altura d’un terrorista”, sentencia Marchán.
Jon Aguirre Such, que participó activament en o 15-M, opina que a mida anunciada por Interior implica a “represión de toda mena d’actividatz de luita” y niega a os ciudadanos a posibilidat de manifestar-se pacificament. “Ye un simptoma muit claro que l’actual Gubierno puede acometer toda mena d’accions ta tractar de mantener un status quo que, cada vegada mas, ye en tela de chuicio”.
Ye por ixo que, seguntes ell, l’Estau recurra a la “lechitimación d’a violencia policial en intrés d’os intreses d’o mercau y d’os achents politicos y economicos”, a os que responsabiliza d’a crisi. “Ye un ataque directo contra os ciudadanos que treballan por os dreitos socials que tanto tiempo, sudor, esfuerzo y glarimas han costau”, asevera Aguirre Such, que se pregunta: “Si os ciudadanos no podemos manifestar-nos pacificament por os nuestros dreitos, qué nos queda?”.
Henrique Mariño
Fuent: Fendo Orella
